नवी दिल्ली - बहुप्रतिक्षीत आणि बहुचर्चित असलेल्या मुंबई- अहमदाबाद बुलेट रेल्वेचा प्रकल्प वेगाने पूर्ण होण्याची चिन्हे आहेत. नॅशनल हाय स्पीड रेल कॉर्प लि. (एनएचएसआरसीएल) संस्थेने डिसेंबरअखेर बहुतांश जमीन संपादित करण्यात येणार असल्याचे म्हटले आहे. ही बुलेट ट्रेन प्रति ताशी ३२० किमी वेगाने ५०८ किमी मार्गावर धावणार आहे.
एनएचएसआरसीएलचे प्रवक्ते सुषमा गौर म्हणाल्या, प्रकल्पाच्या कंत्राटाचे काम निश्चित केल्यानंतर जमीन घेण्यात येणार आहे. ही बुलेट ट्रेन प्रति ताशी ३२० किमी वेगाने मुंबई- अहमदाबाद हे अंतर २ तासात पूर्ण करणार आहे. सध्या हेच अंतर पूर्ण करण्यासाठी रेल्वेला सात तास लागतात. तर विमानाला २ तास लागतात. एनएचएसआरसीएलने लागणाऱ्या एकूण जमिनीपैकी ३९ टक्के म्हणजे १ हजार ३८० हेक्टर जमिनीचे संपादन केले आहे. यामध्ये गुजरातसह महाराष्ट्रातील जमिनीचा समावेश आहे.
बुलेट ट्रेन प्रकल्पाचे काम प्रगतीपथाने होत असल्याचे गौर यांनी सांगितले. गेल्या दोन ते तीन महिन्यांत ३३ टक्के जमिनीचे संपादन करण्यात आले आहे. त्यानंतर ९० दिवसांत ६ टक्के जमिनीचे संपादन करण्यात आल्याचे त्यांनी सांगितले.
भोईसर आणि बांद्रा कॉम्पलेक्सदरम्यान २१ किमीचा बोगदा-
अधिकाऱ्याच्या माहितीनूसार महाराष्ट्रातील भोईसर आणि बांद्रा कॉम्पलेक्सदरम्यान २१ किमीचा बोगदा खणण्यात येणार आहे. यामधील ७ किमीचा मार्ग हा समुद्रामधून जाणार आहे. दरम्यान एनएचएसआरसीएल संस्थेला दादर आणि नगर हवेलीमधील जमीन संपादित करण्यात यश आले नाही.
बुलेट ट्रेनच्या कामासाठी भारताचे जपानबरोबर सहकार्य-
पंतप्रधान नरेंद्र मोदी आणि जपानचे पंतप्रधान शिंझो अॅबे यांनी १४ सप्टेंबर २०१७ ला बुलेट ट्रेनच्या कामाचा शुभांरभ केला. या महत्त्वाकांक्षी बुलेट रेल्वेसाठी १.०८ लाख कोटी रुपये एवढा खर्च होणार आहे. बुलेट ट्रेनच्या कामासाठी जपान आंतरराष्ट्रीय सहकार्य संस्था (जेआयसीए) आणि रेल्वे मंत्रालयात सामंजस्य करार करण्यात आला आहे. त्यासाठी जपान आर्थिक सहाय्यदेखील करणार आहे.
