नवी दिल्ली - केंद्रीय मंत्री नितीन गडकरी यांनी खादी आणि ग्रामोद्योग आयोगाच्या अनोख्या उत्पादनांचे लाँचिग केले. यामध्ये गायीच्या शेणापासून तयार केलेले साबण व बांबूपासून तयार केलेल्या बॉटलचा समावेश आहे.
महात्मा गांधी यांच्या १५० जयंतीच्या पूर्वसंध्येला (१ ऑक्टोबरला) कार्यक्रमाचे आयोजन करण्यात आले. या कार्यक्रमात बोलताना केंद्रीय रस्ते, महामार्ग आणि परिवहन तथा एमएसएमई मंत्री नितीन गडकरी म्हणाले, सेंद्रीय शेतीचा मी पुरस्कर्ता आहे. चांगली कामगिरी करणाऱ्या उत्पादनांचा नॅशनल स्टॉक एक्सचेंजच्या सूचिबद्ध यादीत समावेश करण्यासाठी प्रयत्न करणे आवश्यक आहे.
हेही वाचा-स्मार्टफोनचे नवे युग: दुमडू शकणारा 'सॅमसंग फोल्ड' भारतातही; ही आहेत वैशिष्ट्ये
नॅशनल स्टॉक एक्सचेंजच्या यादीत २० एमएसएमई उद्योगांचा समावेश करण्यात आला आहे. या उद्योगांनी भांडवली बाजारात प्रवेश केला आहे. अशा उद्योगात १० टक्के सरकारने शेअर घेण्याचा प्रस्ताव वित्तीय मंत्रालयाकडे पाठविण्यात आल्याचे त्यांनी सांगितले. येत्या दोन वर्षात खादी आणि ग्रामोद्योग आयोगाने (केव्हीसी) १० हजार कोटींची उलाढाल गाठावी, अशी त्यांनी अपेक्षा व्यक्त केली. यातून ग्रामीण भागात मोठ्या प्रमाणात रोजगारनिर्मिती व्हावी, असेही ते म्हणाले.
हेही वाचा-गांधी@150; ईटीव्ही भारतच्या माध्यमातून देशातील सर्वश्रेष्ठ गायकांकडून बापूंना संगीतमय श्रद्धांजली
खादी आणि ग्रामोद्योग आयोगाकडून विकण्यात येणाऱ्या उत्पादनांच्या ब्रँडिंगची गरज त्यांनी अधोरेखित केली. सेंद्रिय उत्पादनांचा ग्राहकांमध्ये वापर वाढत असल्याचे त्यांनी सांगितले. आपण व्यावसायिक, पारदर्शक आणि गुणवत्तापूर्ण दृष्टीकोतून चांगले पॅकेजिंग केले पाहिजे. हे करताना महात्मा गांधीच्या आर्थिक विचारांशी कुठेही तडजोड करता कामा नये, असे त्यांनी मत व्यक्त केले.
हेही वाचा-गांधी @ १५०: पंतप्रधानांनी राजघाट येथे राष्ट्रपिता महात्मा गांधींना वाहिली श्रद्धांजली
खादी आणि ग्रामोद्योग आयोगाने उत्पादित केलेल्या बांबू बॉटलची किंमत ५६० रुपये आहेत. तर गायीच्या शेणापासून तयार केलेल्या १२५ ग्रॅम साबणाची १२५ रुपये किंमत आहे.
