नवी दिल्ली - केंद्रीय अर्थमंत्री निर्मला सीतारामन सरकारी व खासगी बँकांच्या प्रमुखांची बैठक घेणार आहेत. या बैठकीदरम्यान एमएसएमई, ऑटोमोबाईल क्षेत्राला होणारा वित्तपुरवठा आदी विषयांची चर्चा करण्यात येणार आहे.
साधारणत: केंद्रीय अर्थमंत्री सरकारी बँका व खासगी संस्थांची बैठक घेतात. मात्र वित्त मंत्रालयाने यावेळी खासगी बँकांच्या प्रमुखांनाही बैठकीसाठी बोलाविले आहे. बैठकीमध्ये एमएसएमई, किरकोळ क्षेत्र, ऑटोमोबाईलसह परवडणाऱ्या दरातील घरांना होणाऱ्या वित्तपुरवठ्याबाबत आढावा घेतला जाणार आहे. विकासदराला गती देण्यासाठी बिगर बँकिंग वित्तीय संस्था आणि गृहकर्ज संस्थांना येत्या काही दिवसात प्रोत्साहन देणार असल्याचे वित्तमंत्रालयाने म्हटले आहे. सूत्राच्या माहितीनुसार बैठकीला महसूल आणि कॉर्पोरेट व्यवहार मंत्रालयाचे सचिवही उपस्थित राहणार आहेत.
एमएसएमई क्षेत्रातून सर्वात अधिक रोजगार निर्मिती -
एमएसएमई क्षेत्रातून सर्वात अधिक रोजगार निर्मिती होते. या क्षेत्राच्या विकासासाठी विविध शिफारसी देणारा अहवाल यु.के.सिन्हा समितीने तयार केला आहे. या शिफारसीवरही सीतारामन संबंधितांशी चर्चा करणार आहेत. अहवालात एमएसएमई क्षेत्रासाठी विशेष निधी देण्याची शिफारसही करण्यात आली आहे.
एसबीआयच्या कामगिरीत सुधारणा-
देशातील सर्वात मोठी बँक एसबीआयने पहिल्या तिमाहीत २ हजार ३१२ कोटींचा नफा मिळविण्याची नोंद केली आहे. गेल्या चार आर्थिक वर्षात एसबीआयने ३.५९ लाख कोटी कर्जाची वसूली केली आहे. त्यामध्ये आर्थिक वर्ष २०१८-१९ मध्ये १.२३ लाख कोटी वसूल केले आहेत.
या बैठकीला विविध मंत्रालयाचे प्रतिनिधी, एमएसएमई, एमईआयटीवाय आणि ग्रामीण विकासाचे प्रतिनिधीही उपस्थित राहणार आहेत.
