वाराणसी: ज्ञानवापी प्रकरणात (gyanvapi case) मुख्यमंत्री योगी आदित्यनाथ (yogi adityanath) यांना पक्षकार बनवण्याच्या घोषणेनंतर प्रथमच विश्व वैदिक सनातन संघाच्या (Vishwa Vedic Sanatan Sangha) एका अधिकाऱ्याने कॅमेऱ्यावर निवेदन जारी केले आहे.
काय म्हणाला विश्व वैदिक सनातन संघ: विश्व वैदिक सनातन संघाचे राष्ट्रीय कार्याध्यक्ष संतोष सिंह म्हणाले की, या प्रकरणी मुख्यमंत्री योगी यांना पॉवर ऑफ अॅटर्नी देण्यामागे त्यांची संपूर्ण जगात हिंदुत्वाचा सर्वात मोठा चेहरा म्हणून ओळख हे कारण आहे. ते पुढे म्हणाले की, आमच्या वकिलांना आणि याचिकाकर्त्यांना समाधानकारक रीतीने पुरेशी सुरक्षा पुरविण्यात आलेली नाही. ज्ञानवापी कॅम्पसमध्ये झालेल्या आयोगाच्या कारवाईचे व्हिडिओ आणि फोटो लीक झाले होते. त्याची सीबीआय चौकशी व्हावी, अशी मागणी करण्यात आली होती. मात्र आजतागायत त्याची सुनावणी झालेली नाही. संतोष सिंह म्हणाले की, विश्व वैदिक सनातन संघाच्या पदाधिकारी व कार्यकर्त्यांना एका षड्यंत्राखाली तुरुंगात पाठवण्यात आले, जेणेकरून ते घाबरून ज्ञानवापीशी संबंधित खटले मागे घेतील.
आदित्यनाथ यांनी पॉवर ऑफ अॅटर्नी स्वीकारली नाही तर? : मुख्यमंत्री योगी आदित्यनाथ यांनी पॉवर ऑफ अॅटर्नी स्वीकारली नाही तर काय होईल? या प्रश्नावर संतोष सिंह म्हणाले की, पॉवर ऑफ अॅटर्नी स्वीकारली नाही तर ज्ञानवापीशी संबंधित खटल्यांमध्ये काहीही फरक पडणार नाही. विश्व वैदिक सनातन संघ आजही सर्व खटले स्वबळावर लढत आहे आणि यापुढेही लढत राहील. ज्ञानवापी प्रकरणांची पॉवर ऑफ अॅटर्नी मुख्यमंत्री योगी आदित्यनाथ यांच्याकडे का सोपवण्याचा प्रयत्न करत आहोत, याबाबत आमचे प्रमुख जितेंद्र सिंह विसेन लवकरच पत्रकार परिषदेद्वारे सविस्तर माहिती देतील, असे ते शेवटी म्हणाले.
