हैदराबाद : डेमॉक्रॅटिक पक्षाचे उमेदवार जो बायडेन यांनी अमेरिकेच्या राष्ट्राध्यक्षपदाच्या निवडणुकीत विजय मिळवला आहे. अटीतटीच्या झालेल्या या निवडणुकीत अखेर बायडेन यांना अमेरिकी नागरिकांनी कौल दिला. यामध्ये ट्रम्प यांचा पराभव झाल्यानंतर, त्याबाबतचे कित्येक मीम्स सध्या सोशल मीडियावर व्हायरल होत आहेत. यामध्ये पंतप्रधान नरेंद्र मोदींना भेट दिल्यामुळे ट्रम्प यांचा पराभव झाला, अशा आशयाचे, तर ट्रम्प आता सत्तेत परत येण्यासाठी राज्यपाल भगतसिंह कोश्यारींची भेट घेणार, अशा आशयाचेही कितीतरी मीम्स मोठ्या प्रमाणात शेअर केले जात आहेत. पाहूयात यातील काही मीम्स..
मोदींवर खापर..
पंतप्रधान मोदी हे आंतरराष्ट्रीय पनवती आहेत, आणि ते ज्या राष्ट्राध्यक्षांना भेटतात त्यांची सत्ता जाते, अशा आशयाचे एक मीम सध्या मोठ्या प्रमाणात व्हायरल होत आहे. अमेरिकेच्या निवडणुकीचा निकाल लागण्यापूर्वीच हे मीम तयार करण्यात आले होते. इतर राष्ट्राध्यक्षांचा पराभव झाला, आता ट्रम्प यांचे काय होईल? असे यात विचारले आहे. विशेष म्हणजे ट्रम्प यांचाही खरंच पराभव झाल्यामुळे आता हे मीम व्हायरल होत आहे..
ट्रम्प राज्यपाल कोश्यारींच्या भेटीला..
राज्याच्या विधानसभा निवडणुकीनंतर, पुरेसे संख्याबळ नसतानाही फडणवीस यांनी राज्यपालांची भेट घेत, पहाटेच आपले सरकार स्थापन केले होते. या पार्श्वभूमीवर आता राष्ट्राध्यक्षपदाची निवडणूक हरल्यानंतर ट्रम्पही सरकार स्थापनेसाठी राज्यपालांची भेट घेणार आहेत, असेही एक मीम सध्या व्हायरल होत आहे.
चहापत्ती संपली..
ट्रम्प आपल्याकडे चहापानाला येतील, याचा अंदाज राज्यपालांना आधीच आला आहे. त्यामुळे आपल्याकडची चहापत्ती संपल्याचे राज्यपाल कोश्यारी सांगत आहेत, असेही एक मीम एका ट्रोलरने तयार केले आहे.
अमित शाह तर, बिहारमध्ये बिझी..
एखाद्या राज्यात सरकार स्थापन करण्याबाबत केंद्रीय गृहमंत्री अमित शाह यांचा दरारा तर सर्वांनाच माहीत आहे. यामुळेच, डोनाल्ड ट्रम्पही अमित शाहांना आपली मदत करण्याची विनंती करत आहेत, मात्र शाह सध्या बिहार विधानसभा निवडणुकीत व्यग्र असल्यामुळे त्यांची मदत करण्यास नकार देत आहेत, हा मीम तर देशभरात प्रसिद्ध होतो आहे.
सातारा पॅटर्न अमेरिकेतही..
महाराष्ट्रात महाविकास आघाडीचे सरकार स्थापन होण्यामागे शरद पवारांच्या सातारमधील सभेचा मोठा वाटा मानला जातो. काही दिवसांपूर्वी बायडेन यांनीही अशीच पावसात आपली सभा घेतली होती. त्यानंतर आता तेही निवडणूक जिंकले आहेत. त्यामुळे निवडणूक जिंकण्यासाठीचा हा 'सातारा पॅटर्न' ट्विटरवर चांगलाच ट्रेंड होतो आहे.
बायडेन सरकार ११ दिवसांत कोसळणार..
महाविकास आघाडी सरकार ११ दिवसांमध्ये कोसळणार आहे, अशी घोषणा काही महिन्यांपूर्वी नारायण राणे यांनी केली होती. त्याप्रमाणेच आताही ते बायडेन सरकार ११ दिवसांमध्ये कोसळणार असल्याची घोषणा करत असल्याचे मीम लोकप्रिय होत आहे.
५६ इंचामुळे ट्रम्पचा पराभव..
ट्रम्प यांना विजयासाठी २७० इलेक्टोरल व्होट्सची गरज असताना, केवळ २१४ व्होट्स मिळाले. २७०-२१४ = ५६! त्यामुळे ट्रम्प यांच्या पराभवासाठी 56 इंचाचे कारण असल्याचा अफलातून शोध सध्या व्हॉट्सअपवर व्हायरल होतो आहे.
बघतोय काय रागानं; व्हाईट हाऊस मारलंय वाघानं!
सोशल मीडियावर बायडेन यांचे विशेष पद्धतीने अभिनंदन करण्यात येत असल्याचे दिसून येत आहे. त्यांना शुभेच्छा देणारे विविध प्रकारचे 'बॅनर' सध्या व्हायरल होत आहेत.
(हे मीम्स इंटरनेटवरुन घेण्यात आले आहेत. ईटीव्ही भारत यामधील मजकुराची जबाबदारी घेत नाही.)
