कोलकाता - पश्चिम बंगालमध्ये विधानसभा निवडणुकीचा बार उडणार आहे. तृणमूल काँग्रेसचे नेते सुवेंदू अधिकारी यांनी भाजपात प्रवेश केल्यानंतर त्यांचे वडिल शिशिर अधिकारी यांनीही भाजपाची वाट धरली. रविवारी केंद्रीय गृहमंत्री अमित शहा यांच्या मेळाव्यात शिशिर अधिकारी उपस्थित होते.
शिशिर अधिकारी यांचे पूत्र सुवेंदू अधिकारी यांनी गेल्या वर्षी डिसेंबर महिन्यात भाजपामध्ये प्रवेश केला होता. सुवेंदू अधिकारी टीएमसी सरकारमध्ये मंत्री होते आणि ते ममता बॅनर्जी यांचे अगदी निकटचे मानले जात. त्यांच्या जाण्याने तृणमूल काँग्रेसला मोठा धक्का बसला होता. ते भाजपात गेल्यानंतर शिशिर देखील भाजपात जाणार असल्याच्या चर्चा सुरू होत्या. तर सुवेंदू अधिकारीचा भाऊ दिव्येंदू अधिकारी पूर्व मिदनापूरमधील तामलूक लोकसभा मतदारसंघाचे खासदार आहेत. दिब्येंदू अधिकारी यांनी आपण ममता बॅनर्जी यांचा कार्यकर्ता असून मी त्यांच्यासाठीच लढत राहणार, असे स्पष्ट केले आहे.
प. बंगालमध्ये राजकीय स्थिती काय?
पश्चिम बंगालमध्ये विधानसभेच्या एकूण 294 जागा आहेत. याठिकाणी बहुमतासाठी 148 आमदारांच्या संख्याबळाची गरज आहे. सरकार स्थापनेसाठी राजकीय पक्षाला अथवा राजकीय आघाडीकडे 148 जागांचे बहुमत असणे अनिवार्य आहे. गेली निवडणूक 2016 मध्ये पार पडली होती. ममता बॅनर्जीच्या नेतृत्वाखालील तृणमूल काँग्रेस पक्षाने 211 जागांवरील विजयासह सपशेल बहुमत मिळवले व पश्चिम बंगालमधील आपली सत्ता राखली. तर काँग्रेसला 44 , डाव्या पक्षांना 26 आणि भाजपला अवघ्या तीन जागांवर विजय मिळाला होता.
हेही वाचा - ओडिसी नृत्यांगना लक्ष्मीप्रिया मोहापात्रा यांचे वयाच्या 86 व्या वर्षी निधन
