अजमेर - राजस्थान दौर्‍याच्या दुसर्‍या दिवशी काँग्रेसचे माजी अध्यक्ष राहुल गांधी यांनी अजमेर जिल्ह्यातील रूपनगर भागात ट्रॅक्टर मेळावा घेतला. राहुल गांधींनी कृषी कायद्यावरून मोदी सरकारवर जोरदार हल्ला चढविला. मोदी सरकारला तीन कृषी कायद्याद्वारे शेतकऱयाला आणखी गरीब बनवायचे आहे. देशातील सर्वात मोठा कृषी व्यवसाय शेतकऱयांकडून हिसकावून दोन व्यक्तींककडे सोपवायचा आहे, अशी टीका त्यांनी मोदींवर केली.
भारतातील सर्वात मोठा व्यापार म्हणजे शेती व्यापार. देशातील 40 टक्के लोक या व्यापाराशी जोडलेले आहेत.छोटे उद्योजक, मजूर, फळे आणि भाज्या विक्रेते सर्व शेती व्यापाराशी प्रत्यक्ष व अप्रत्यक्षरित्या जोडलेले आहेत, असे ते म्हणाले.
उद्योजक 40 टक्के धान्यावर नियंत्रण ठेवतील. स्वस्त दरात शेतकऱ्यांकडून धान्य, फळे आणि भाज्या खरेदी करतील आणि सर्वसामान्यांना आणि शेतकऱ्यांना पुन्हा महागड्या दराने विकतील, असे राहुल गांधी म्हणाले .
शेतकरी मोदींशी बोलण्यास तयार नाहीत. जोपर्यंत कृषी कायदे मागे घेत नाहीत, तोपर्यंत ते मोदींशी बोलणार नाहीत. उद्योगपती धान्य, फळे आणि भाज्या साठवू शकतात. यामुळे अमर्यादित साठेबाजी होईल, असे राहुल गांधी म्हणाले. यापूर्वी लोकसभेत राहुल गांधी यांनी राहुल गांधी यांनी तीन कायद्यांचा हेतू आणि मसुद्याचे विश्लेषण करून सांगण्याचा प्रयत्न केला होता.
तीन कायद्यांच्या कॉन्टेंटवर बोलताना राहुल गांधी म्हणाले-
पहिला कायदा - देशातील कोणताही व्यक्ती कितीही प्रमाणात धान्य, भाजीपाला, फळे खरेदी करू शकतो. ही खरेदी जर एखाद्यानेच अमर्यादित प्रमाणात केली तर मंडीमध्ये कोण जाणार? मंडीत जाऊन कोण खरेदी करणार? म्हणजेच पहिल्या कायद्याद्वारे मंडीला संपवले जाईल. याचा उद्देश मंडीला बंद करणे हा आहे.
दुसरा कायदा - देशातील कोणताही व्यक्ती (मोठे उद्योगपती) कितीही प्रमाणात धान्य, भाजीपाला, फळे यांचा साठा करून ठेवू शकतात. म्हणजेच साठेबाजी करण्यासाठी खुली परवानगीच दिली जाणार, त्यातून साठेबाजी न करण्याचा कायदा मोडीत निघू शकतो. दुसऱ्या कायद्याचा हेतू हा दिसतो की, जीवनावश्यक वस्तू कायदा बंद करणे.
तिसरा कायदा - देशातील एखादा शेतकरी त्याचा शेत माल खासगी उद्योगपतींना विकल्यानंतर त्याच्याकडून झालेल्या पैशांच्या व्यवहाराविषयी न्यायालयात दाद मागू शकत नाही.
