हैदराबाद - जेनेटीक हाय कॉलेस्ट्रॉल आणि हृदयविकार असणाऱ्या लोकांना जर कोरोनाची लागण झाली, तर त्यांना हृदयविकाराचा झटका येण्याचा धोका अधिक वाढतो. एका नव्या संशोधनामध्ये हा दावा करण्यात आला आहे. 'अमेरिकन जर्नल ऑफ प्रिवेंटिव्ह कार्डिओलॉजी' या वैज्ञानिक नियतकालिकामध्ये याबाबतचा संशोधन अहवाल प्रकाशित करण्यात आला आहे. या अहवालात असेही म्हटले आहे, की कोविड-१९ मुळे एथेरोस्क्लेरोटीक हृदय व रक्तवाहिन्यासंबंधी आजार (एएससीव्हीडी) असणाऱ्या लोकांमध्येही हृदयविकाराचा झटका येण्याचा धोका वाढतो.
फॅमिलिअल हायपरकॉलेस्ट्रोलेमिया (एफएच) ही एक सामान्य अनुवांशिक स्थिती आहे, ज्यामध्ये लो डेन्सिटी लिपोप्रोटीन कोलेस्ट्रॉल (एलडीएल-सी)च्या स्तरामध्ये वाढ होते. यामुळे हृदयविकार असलेल्या रुग्णांचा धोका २० पटींनी वाढतो. संशोधकांच्या म्हणण्यानुसार, ज्या एफएच किंवा एएससीव्हीडी यांसोबतच कोविडची लागण झालेल्या लोकांना, इतर एफएच किंवा एएससीव्हीडी असणाऱ्या लोकांच्या तुलनेत (ज्यांना कोरोना झाला नव्हता) सात पटीने अधिक हृदयविकाराचे धक्के जाणवले. एफएच फाऊंडेशनच्या प्रमुख वैद्यकीय अधिकारी मॅरी मॅकगोवन यांनी सांगितले, की या संशोधनामुळे आता हृदयविकार किंवा हाय कॉलेस्ट्रॉल असणाऱ्या लोकांना एक इशारा मिळाला आहे. यामुळे ते अधिक सतर्क होतील आणि स्वतःची अधिक काळजी घेतील.
या संशोधनासाठी संशोधकांनी तब्बल ५ कोटी, ५४ लाख, १२ हजार ४६२ लोकांचा अभ्यास केला. या लोकांना सहा गटांमध्ये विभाजित करण्यात आले होते. यात ज्यांना एफएचची लागण झाली आहे असे, ज्यांना एफएचचील लागण होऊ शकते असे, आणि एएससीवीडी असणारे असे तीन गट होते. यातील मग कोरोनाची लागण झालेले तीन आणि न झालेले तीन असे एकूण सहा गट केले गेले. यानंतर मग वर्षभर केलेल्या निरीक्षणानंतर संशोधकांना हे समजले, की कोरोना नसलेल्या लोकांच्या तुलनेत असलेल्या लोकांना अधिक प्रमाणात हृदयविकाराचे झटके आले. एफएच फाऊंडेशनचे सीईओ केली मायर्स यांनी हे संशोधन अगदीच महत्त्वपूर्ण असल्याचे म्हटले आहे.
हेही वाचा - मुंबईतील रुग्णालयांना थेट केंद्राकडून लसीकरणाची परवानगी, महापौरांनी घेतला आक्षेप
