कोलकाता : पश्चिम बंगाल विधानसभा निवडणुकीसाठी, पंतप्रधान नरेंद्र मोदी यांची पहिली प्रचारसभा आज पार पडली. कोलकात्याच्या ब्रिगेड मैदानात झालेल्या या सभेत मोदींनी ममता बॅनर्जी यांच्यावर निशाणा साधला. यावेळी त्यांनी ममतांनी आपल्या लोकांना विश्वासघात आणि अपमान केल्याचा आरोप मोदींनी केला.
पक्षातील घराणेशाहीवर मोदींचा निशाणा..
"बंगालच्या लोकांनी ममतांवर विश्वास ठेऊन त्यांना सत्तेत आणले. मात्र, सत्तेत आल्यानंतर त्यांनी लोकांची 'दीदी' म्हणून काम न करता, आपल्या भाच्याची 'आत्या' या आपल्या भूमीकेकडे जास्त लक्ष दिले." असे म्हणत मोदींनी सत्तेतील घराणेशाहीवर टीका केली. बंगालचा पुढचा मुख्यमंत्री म्हणून ममता यांचे भाचे आणि खासदार अभिषेक यांची निवड करण्याचा प्रयत्न तृणमूल करत आहे असा आरोप भाजपा गेल्या काही दिवसांपासून करत आहे. त्यासंबंधी ही टीका मोदींनी केली.
बंगालमधील आणि भारतातील लोक माझे मित्र..
"भारतातील सर्व १३० कोटी लोक हे मला मित्राप्रमाणे आहेत, आणि मी त्यांच्यासाठी काम करतो. माझ्या बंगालमधील मित्रांना मी ९० लाख गॅस कनेक्शन दिलेत. मला चहाबाबत, आणि बंगालमधील चहाच्या मळ्यांमध्ये काम करणाऱ्या माझ्या मित्रांबाबात आपुलकी आहे ज्यांच्यासाठी मी सामाजिक सुरक्षा योजना सुरू केली" असेही मोदी म्हणाले.
तृणमूल 'स्थानिक', तर 'भाजपा' काय बाहेरचा?
ममतांनी यापूर्वी मोदींवर ते 'बाहेर'चे असल्याचा आरोप केला होता. यावर बोलताना ते म्हणाले, की "मार्क्स आणि लेनिनच्या विचारसरणीवर चालणारा एक पक्ष, जो काँग्रेसचा एक भाग आहे असा तृणमूल जर 'स्थानिक' पक्ष असेल. तर, श्याम प्रसाद मुखर्जींच्या विचारसणीतून प्रेरणा घेऊन तयार झालेला भाजपा हा पक्ष बाहेरच्यांचा कसा असू शकतो?"
बंगालमधील चिखलात यावेळी कमळ उमलणार..
बंगालमध्ये खरे परिवर्तन आणि सर्वांसोबत सर्वांचा विकास करण्यासाठी आपण काम करणार असल्याचे मोदी यावेळी म्हणाले. तसेच, तृणमूल काँग्रेसच्या प्रशासनात लोकशाही नसून लूटशाही सुरू असल्याचा आरोपही त्यांनी यावेळी केला. ममतांनी गेल्या दहा वर्षात बंगालमध्ये जो चिखल पसरवला आहे, त्याठिकाणीच आता कमळ उगवणार असल्याचे मोदी म्हणाले.
हेही वाचा : ममतांच्या 'स्कूटी'ने नंदीग्राममध्येच पडायचं ठरवलंय, तर त्याला आम्ही काय करणार? - पंतप्रधान मोदी
