पोरबंदर : गुजरात निवडणुकीत (Gujarat assembly Election) पोरबंदर जिल्ह्यात यावेळी 54 टक्के मतदान झाले. आता सर्वांच्या नजरा पोरबंदरच्या कुतियाना विधानसभा जागेवर लागल्या आहेत. (kutiyana assembly seat). गेल्या दोन वेळा राष्ट्रवादीतून आमदार झालेले कांधल जडेजा (kandhal jadeja) यावेळी समाजवादी पक्षाकडून निवडणूक लढवत आहेत. राष्ट्रवादीचे माजी नेते कांधल जडेजा हे सलग दोन टर्मपासून कुतियानामध्ये वर्चस्व गाजवत आहेत. यावेळी भाजपने कुटियानामधून झेलीबेन ओडेदरा यांना तर काँग्रेसने नाथा ओडेदरा यांना तिकीट दिले आहे. या विधानसभा निवडणुकीत राष्ट्रवादीने त्यांना तिकीट नाकारल्यानंतर कांधल जडेजा यांनी समाजवादी पक्षाच्या तिकीटावर निवडणूक लढवली. तर आम आदमी पक्षाने भीमाभाई मकवाना यांना उमेदवारी दिली होती.
कांधल जडेजा यांचे वर्चस्व : 2017 च्या विधानसभा निवडणुकीत कांधल जडेजाने भाजप नेते लक्ष्मण ओडेदरा यांचा पराभव करून कुतियाना विधानसभा जागा जिंकली होती. या निवडणुकीत काँग्रेस आणि राष्ट्रवादीची आघाडी नसतानाही त्यांनी भाजप आणि अपक्षांसह 11 उमेदवारांचा एकहाती पराभव केला होता. त्यावेळी ते 24 हजारांहून अधिक मतांनी विजयी झाले होते. 2012 च्या विधानसभा निवडणुकीतही कांधल जडेजाने सलग दोन वेळा निवडून आलेले भाजप नेते कर्शन ओडेद्रा यांचा मोठ्या फरकाने पराभव केला होता.
जातीय समीकरण : कुतियाना विधानसभा मतदारसंघात सर्वाधिक मतदार हे मेहर समाजाचे आहेत. येथे सुमारे 2 लाख 25 हजार 763 मतदार नोंदणीकृत आहेत. बहुतांश मतदार हे मेहर जातीचे असल्याने सर्वच राजकीय पक्ष निवडणूक प्रचारात मेहर जातीच्या नेत्याला प्राधान्य देतात. येथूनच देवी मातेच्या नावाने राज्यभर प्रसिद्ध झालेल्या दिवंगत संतोकबेन जडेजा याही आमदार राहिल्या आहेत, ज्या कांधल जडेजाच्या आई आहेत. ही जागा राज्यातील बाहुबली सीट म्हणून प्रसिद्ध आहे.
राजकीय पार्श्वभूमी : सौराष्ट्रातील दबंग नेते कांधल जडेजा यांना मोठा राजकीय वारसा लाभला आहे. कांधल जडेजाचे वडील सरमन मुंजा जडेजा आणि आई संतोकबेन जडेजा हे देखील सौराष्ट्रसह संपूर्ण गुजरातमध्ये प्रसिद्ध आहेत. संतोकबेन जडेजा आणि भुरा मुंजा जडेजा हे राणावाव-कुटियाना मतदारसंघातून आमदार राहिले आहेत. कांधल जडेजा यांनी 2012 मध्ये राणावाव-कुटियाना मतदारसंघातून राष्ट्रवादीकडून पहिल्यांदा निवडणूक लढवली होती. तीन वेळा विजयी झालेल्या कांधल जडेजाने भाजप उमेदवाराचा 18,000 हून अधिक मतांनी पराभव केला होता.
