वाराणसी French National Cremated In Kashi : आध्यात्मिक नगरी काशीची ओळख जगातील सर्वात प्राचीन शहर म्हणून आहे. येथे गेल्या ५००० वर्षांपूर्वीच्या मानवी संस्कृतीच्या खुणा आढळतात. या काशी नगरीत जगभरातून लोक 'मोक्ष' प्राप्तीसाठी येतात. याचीच प्रचिती नुकत्याच घडलेल्या एका घटनेत आली.
फ्रेंच नागरिकावर काशीत अंत्यसंस्कार : काशी शहरात आध्यात्मिक प्रवासासाठी आलेल्या एका फ्रेंच नागरिकाचा नुकताच मृत्यू झाला. या व्यक्तीवर काशीच्या हरिश्चंद्र घाटावर हिंदू रितीरिवाजांनुसार अंत्यसंस्कार करण्यात आले आहेत. मायकेल नावाची ही व्यक्ती काही दिवसांपूर्वी काशीला आली होती. त्याला काशीमध्ये 'मोक्ष' मिळवायचा होता. मायकलचं तीन दिवसांपूर्वी काशीतच निधन झालं.
काशीमधली अशाप्रकारची पहिलीच घटना : मायकलचं पार्थिव काशी हिंदू विद्यापीठाच्या ट्रॉमा सेंटरच्या शवागारात ठेवण्यात आलं होतं. वाराणसीचे आयुक्त कौशल राज शर्मा यांनी त्याच्या अंत्यसंस्काराचा खर्च उचलला, असं एका अधिकाऱ्यानं सांगितलं. काशीमधली ही पहिलीच घटना आहे, जेव्हा एखाद्या फ्रेंच नागरिकावर हिंदू रितीरिवाजांनुसार अंत्यसंस्कार करण्यात आले. तीन दिवसांपूर्वी त्याचं निधन झालं. त्यानं शेवटचे सुमारे २० दिवस काशीत घालवले.
काशीत राहण्यासाठी संघर्ष करावा लागला : अध्यात्माला मानणाऱ्या हिंदूंना त्यांच्या आयुष्याचा शेवटचा काळ काशीमध्ये घालवायचा असतो. फ्रेंच नागरिक असलेल्या मायकलला त्याच्या आजाराची माहिती मिळाल्यानंतर तो काशीला आला. त्याला या शहरातच आयुष्याचा शेवट घालवायला होता. काशीमध्ये आयुष्याचा शेवटचा टप्पा जगण्यासाठी त्याला खूप संघर्ष करावा लागला. खूप प्रयत्नांनंतर त्याला काशीत राहण्यासाठी जागा मिळाली होती.
प्रशासनानं मदत केली : मायकल वाराणसीला आल्यावर त्याला राहायला जागा मिळाली नाही. तो एका गेस्ट हाऊसमध्ये राहू लागला. तेथे तो सुमारे १० दिवस राहिला. मात्र गंभीर आजारामुळे तो खोलीत बेशुद्ध पडला. बेशुद्ध पडल्यानंतर मायकेलला कबीरचौरा विभागीय रुग्णालयात दाखल करण्यात आलं. तो सुमारे १० दिवस त्या रुग्णालयात दाखल होता. त्यानंतर जिल्हा प्रशासनानं पुढाकार घेत त्याला घाटावर असलेल्या अपना घर आश्रमात आश्रय दिला. तेथे त्याच्यावर उपचार सुरू होते. मात्र तीन दिवसांपूर्वी त्याचा मृत्यू झाला.
हेही वाचा :
