मुंबई - दिल्ली कॅपिटल्सने बुधवारी (IPL-2022)च्या सामन्यात माजी चॅम्पियन राजस्थान रॉयल्सचा 8 गडी राखून पराभव केला. मुंबईच्या डीवाय पाटील स्टेडियमवर खेळल्या गेलेल्या या सामन्यात राजस्थानने 20 षटकात 6 गड्यांच्या मोबदल्यात 160 धावा केल्या. दिल्लीने 18.1 षटकांत 2 गडी गमावून लक्ष्य गाठले. ( RR vs DC ) या विजयासह दिल्लीच्या प्लेऑफमध्ये पोहोचण्याच्या आशा अबाधित राहिल्या असून, राजस्थानही या शर्यतीत कायम आहे. राजस्थानचा कर्णधार संजू सॅमसनने सामन्यानंतर सांगितले की, त्याच्या संघाने 15-20 धावा कमी केल्या आणि नंतर झेलही सोडले, त्यामुळे पराभव स्वीकारावा लागला.
मिचेल मार्शने दिल्ली कॅपिटल्सच्या विजयात महत्त्वपूर्ण योगदान दिले आणि त्याला सामनावीर म्हणून गौरवण्यात आले. त्याने 62 चेंडूत 89 धावांची खेळी खेळली ज्यात 5 चौकार आणि 7 षटकार मारले. त्याचवेळी सलामीवीर डेव्हिड वॉर्नर 41 चेंडूत 5 चौकार आणि 1 षटकाराच्या मदतीने नाबाद 52 धावा करून परतला. ( RR vs DC IPL 2022 ) मार्श आणि वॉर्नर यांनी दुसऱ्या विकेटसाठी 144 धावांची भागीदारी केली. तत्पूर्वी, राजस्थान रॉयल्ससाठी क्रमांक-3वर फलंदाजी करताना रविचंद्रन अश्विनने अर्धशतक केले. त्याने 38 चेंडूत 50 धावांच्या खेळीत 4 चौकार आणि 2 षटकार ठोकले.
सामन्यानंतर संजू सॅमसन म्हणाला, आम्ही काही धावा कमी करू शकलो आणि नंतर मध्येच काही विकेट घेऊ शकलो नाही. आम्ही फलंदाजी करत असताना विकेटवर गती होती. आम्ही 15-20 धावा कमी होतो. मग क्षेत्ररक्षणही खराब झाले आणि आम्ही काही महत्त्वाचे झेल सोडले. खरंच निराश झालो, पण पुढच्या सामन्यात आम्ही पुनरागमन करू इच्छितो.
तो पुढे म्हणाला, 'आयपीएलमधील कोणताही सामना गमावल्यानंतर आम्हाला मजबूत पुनरागमन करण्याची गरज आहे आणि मला आशा आहे की आम्ही मजबूत पुनरागमन करू. आम्ही यापूर्वीही हे केले आहे.' सॅमसनने असेही सांगितले की शिमरॉन हेटमायर लवकरच मैदानात परतेल, ज्याच्या जागी रसी व्हॅन डर डुसेनला प्लेइंग इलेव्हनमध्ये स्थान देण्यात आले आहे. मात्र, तो 7व्या क्रमांकावर फलंदाजी करताना 12 धावा करून नाबाद परतला.
तत्पूर्वी, राजस्थान रॉयल्सची सुरुवात चांगली झाली नाही. जाणकार फलंदाज जोस बटलर अवघ्या 7 धावा करून पॅव्हेलियनमध्ये परतला. जैस्वालने 19 चेंडूत 29 धावा केल्या. अश्विनने 38 चेंडूत 50 धावा केल्या. कर्णधार संजू सॅमसनला केवळ 6 धावा करता आल्या. रियान पराग 9 धावा करून बाद झाला. देवदत्त पडिकल 30 चेंडूत 48 धावा करून पॅव्हेलियनमध्ये परतला. दिल्ली 12 पैकी 6 सामने हरले असून 12 गुणांसह पाचव्या स्थानावर आहे. दुसरीकडे, राजस्थानने 14 गुणांसह तिसरे स्थान कायम राखले आहे.
