नवी दिल्ली - दिल्लीच्या सफदरजंग रुग्णालयासमोर एका महिलेने आपल्या ६ वर्षांच्या मुलीवर पेट्रोल ओतून तिला पेटवून देण्याचा प्रयत्न केला. या महिलेला आणि तिच्या मुलीला पोलिसांनी ताब्यात घेतले आहे. ही महिला उन्नाव बलात्कार पीडितेच्या मृत्यूनंतर रुग्णालयासमोर निषेध करत होती.
'माझ्या मुलीवरही कोणी बलात्कार करेल आणि तिला जिवंतपणी पेटवून देऊ शकेल. त्याआधी मीच तिला जाळून टाकते आणि स्वतःलाही जाळून घेते,' असे या महिलेचे म्हणणे होते. मात्र, या महिलेने मुलीवर पेट्रोल टाकून तिला पेटवण्याचा प्रयत्न केल्यानंतर लगेच पोलिसांनी तिला ताब्यात घेतले. पोलिसांच्या सतर्कतेमुळे या माय-लेकींचा जीव वाचला. ही महिला मानसिक रुग्ण असल्याचे सांगितले जात आहे.
जिवंत पेटवून देण्यात आलेल्या उन्नाव बलात्कार पीडितेची प्राणज्योत शुक्रवारी रात्री सफदरजंग रुग्णालयात मालवली. यानंतर या भागातील वातावरण तणावपूर्ण बनले आहे.
