लखनऊ - उन्नावमध्ये अत्याचार झालेल्या एका २३ वर्षीय तरुणीला जिवंत जाळण्यात आले होते. या प्रकरणातील आरोपींच्या रक्ताचे नमुने गोळा करण्याची परवानगी स्थानिक न्यायालयाने पोलिसांना दिली आहे. त्यानुसार शुभम, शिवम, हरी शंकर, उमेश आणि राम किशोर या सर्व आरोपींच्या रक्ताचे नमुने काल (मंगळवार) गोळा करण्यात आले.
आम्ही पीडितेचे कपडे, मोबाईल फोन, बॅग आणि पाण्याची बाटली अशा गोष्टी ठेवल्या आहेत. त्यावरील डीएनए सॅम्पल्स आणि आरोपींचे डीएनए तपासून, ते जुळतात का हे आम्ही पाहणार आहे. अशी माहिती उन्नाव पोलीस अधीक्षक विक्रांत वीर यांनी दिली. आम्ही हे संपूर्ण प्रकरण शास्त्रीय पुराव्यांच्या आधारे हाताळणार आहोत. आम्हाला भक्कम पुरावे मिळाल्यानंतर आम्ही त्याआधारे चार्जशीट भरणार असल्याचेही त्यांनी स्पष्ट केले.
मोबाईल लोकेशनही ठरणार महत्त्वाचा पुरावा..
आम्ही आतापर्यंत तांत्रिक पुरावे गोळा केले आहेत. ज्यामध्ये मोबाईल हा महत्त्वाचा पुरावा ठरणार आहे. ज्या ठिकाणी पीडितेला मारण्यात आले, त्यावेळी त्या ठिकाणापासून जवळच हे पाचही जण उपस्थित होते, हे त्यांच्या मोबाईल लोकेशनवरून समजले आहे. हा योगायोग नक्कीच असू शकत नाही, असे वीर यांनी सांगितले. तसेच, या सर्वांनी नोंदवलेल्या जबाबांमध्येही तफावत आढळल्याचे ते पुढे म्हणाले.
पोलीस अधीक्षक विनोद कुमार पांडे यांच्या अध्यक्षतेखाली नेमण्यात आलेले विशेष पथक या प्रकरणाचा तपास करत आहेत.
हेही वाचा : सार्वजनिक मालमत्तेचे नुकसान करणाऱ्यांना जागीच गोळ्या घाला; केंद्रीय मंत्र्यांचा 'आदेश'!
