top 10@ 11 PM:रात्री अकरापर्यंतच्या बातम्या...

राज्यासह देश, विदेशातील राजकारण, कोरोना यासह इतर महत्त्वाच्या बातम्या. वाचा, एका क्लिकवर...

• औरंगाबाद - मराठा आरक्षणासाठी एका तरुणाने विष पिऊन आत्महत्या करण्याचा प्रयत्न केल्याची घटना घडली आहे. ही घटना क्रांती चौक येथे घडली. विष पिताना तरुणाने फेसबुक लाईव्ह सुरू केले होते. पोलिसांना याबाबत कळताच त्यांनी वेळीच तरुणाला रोखले. तरुणाला घाटी रुग्णालयात उपचारासाठी दाखल करण्यात आले आहे.

• वॉशिंग्टन : राष्ट्राध्यक्षपदी निवडून आलेल्या जो बायडेन यांचा शपथविधी सोहळा थोड्याच वेळात सुरू होणार आहे. त्यांच्यासोबत भारतीय वंशाच्या कमला हॅरीस या उपाध्यक्ष पदाची शपथ घेतील. यानंतर बायडेन हे अमेरिकेचे ४६ वे अध्यक्ष ठरणार आहेत. तर कमला हॅरीस या देशाच्या पहिल्याच महिला उपाध्यक्ष असणार आहेत.

• मुंबई - भारताच्या ऑस्ट्रेलिया दौऱ्यानंतर आता सर्वांना आयपीएलच्या नव्या पर्वाचे वेध लागले आहे. काही महिन्यांपूर्वी यूएईमध्ये आयपीएलचा तेरावा हंगाम खेळवण्यात आला. यात मुंबई इंडियन्सने दिल्ली कॅपिटल्सवर सरशी साधत पाचव्यांदा विजेतेपद पटकावले. आता नव्या पर्वात आयपीएलमधील सहभागी फ्रेंचायझींनी त्यांच्या संघात कायम केलेल्या आणि संघातून मुक्त केलेल्या खेळाडूंची यादी जाहीर केली आहे.

• हैदराबाद : कमला देवी हॅरिस, विवेक मूर्ती, गौतम राघवन, माला अडिगा, विनय रेड्डी, भरत राममूर्ती, नीरा तांडेन, सेलिन गौंडर, अतुल गावंडे ही काही भारतीय नावे आहेत; ज्यांना यापूर्वी कधीच नव्हते इतके व्हाईट हाऊसच्या अति-अंतर्गत वर्तुळात महत्त्व प्राप्त झाले आहे. अमेरिकन उपाध्यक्षपदी निवड झालेल्या कमला हॅरिस यांचे नाव २०२०च्या प्रचार मोहिमेत प्रथम अवतरल्यापासून काही आठवड्यांच्या आतच ही नावे अमेरिकन सत्तावर्तुळात फिरत आहेत.

• मुंबई - 'तांडव' वेब सीरिज प्रकरणी आमच्याकडे तक्रार आलेली असून नियमानुसार या संदर्भात कारवाई केली जाईल, असे आश्वासन गृहमंत्री अनिल देशमुख यांनी दिले आहे. याबरोबरच ओटीटी प्लॅटफॉर्मवर प्रदर्शित होणाऱ्या वेब सीरिजच्या बाबतीत केंद्र शासनाने कायदे व नियम बनवायला हवेत, असे गृहमंत्री देशमुख यांनी केंद्र सरकारला सुचवले आहे.

• नवी दिल्ली - केंद्राच्या कृषी कायद्यांविरोधात गेल्या दोन महिन्यापासून शेतकऱ्यांचे आंदोलन सुरू आहे. मंगळवारी सायंकाळी टिकरी सीमेवरील एका आंदोलन शेतकऱ्याने विष घेत आत्महत्या करण्याचा प्रयत्न केला होता. त्या शेतकऱ्याचा रात्री 2:30 वाजता मृत्यू झाला आहे. संबधित शेतकऱ्यांची ओळख पटली असून जय भगवान असे त्यांचे नाव आहे. ते हरयाणाच्या रोहतकमधील पाकिस्मा गावातील रहिवासी आहेत.

• गांधीनगर - गुजरात सरकारने निवडूंग प्रवर्गातील 'ड्रॅगन फ्रूट'चे नाव बदलून टाकले आहे. या फळाला आता 'कमलम' असे अधिकृत नाव देण्यात आले आहे. शहरे, विद्यापीठ आणि गावांची नावे बदलण्याची मागणी होत असल्याचे आत्तापर्यंत ऐकलं होते. मात्र, गुजरात सरकारने धाडसी निर्णय घेत फळाचेच नाव बदलले आहे. हे नाव चीनशी संबधित वाटत असल्याने आम्ही बदलल्याचे त्यांनी म्हटले आहे. विशेष म्हणजे भाजपाच्या गुजरातमधील कार्यालयाचे नावही 'कमलम' आहे.

• मुंबई - मद्यधुंद अवस्थेत गाडी चालवणाऱ्याची संख्या जास्त आहे. त्यामुळे मद्यधुंद अवस्थेत गाडी चालवणाऱ्यांना चाप बसवण्यासाठी आणि रस्ते अपघातांचं प्रमाण कमी करण्यासाठी राज्य सरकारनं एक मोठं पाऊल उचललं आहे. मद्यधुंद अवस्थेत वाहन चालवणाऱ्यांना 10 हजार रुपये आणि विनापरवाना वाहन चालवणाऱ्यांना 5 हजार रुपयांचा दंड ठोठवण्याचा राज्य सरकारचा विचार आहे.

• मुंबई - मराठा आरक्षणा संदर्भात सर्वोच्च न्यायालयात आज सुनावणी होणार आहे. पाच न्यायमूर्तींच्या खंडपीठापुढे ही सुनावणी होणार आहे. यापूर्वी ही सुनावणी २५ जानेवारीला निर्धारित करण्यात आली होती. मात्र,आता सुप्रीम कोर्टात हे प्रकरण बुधवारी म्हणजेच २० जानेवारीला लिस्ट झाले होते. त्यामुळे मराठा आरक्षणावरील सुनावणी आजपासून पाच न्यायमूर्तींच्या घटनापीठापुढे होणार होती. दरम्यान, मराठा आरक्षणावरील स्थगिती उठवण्याबाबतच्या आजच्या या सुनावणीला स्थगिती देण्यात आली आहे. आता ही सुनावणी 5 फेब्रुवारीला होणार आहे.

• मुंबई - प्रसिद्ध चित्रपट निर्माते साजिद खान यांच्यावर आणखी एक आरोप झाला आहे. हा आरोप बॉलीवूड अभिनेत्री शर्लिन चोप्रा हिने केला आहे. साजिदने ६ वर्षापूर्वी भेटीदरम्यान केलेल्या कृत्याचे कथन शर्लिनने सोशल मीडियाच्या माध्यमातून सांगितले आहे. त्यात तिने साजिदने लैंगिक छळ केल्याचा आरोप केला आहे.