इटलीच्या पत्रकाराचा मोठा खुलासा; बालाकोटमध्ये १७० दहशतवाद्यांचा खात्मा, ४५ जणांवर अद्यापही उपचार सुरूच

'उपचारांनंतर जे दहशतवादी बरे झाले, त्यांना पाकिस्तानी लष्कराने ताब्यात ठेवले आहे. त्यांना रुग्णालयातून डिस्चार्ज देण्यात आलेला नाही,' असे मॅरिनो यांनी म्हटले आहे. मॅरिनो यांनी अनेक आठवडे शोध घेतल्यानंतर सूत्रांच्या माध्यमातून महत्त्वाची माहिती संकलित केली आहे.

नवी दिल्ली - भारताने पाकिस्तानातील बालाकोटमध्ये २६ फेब्रुवारीला एअर स्ट्राइक केला होता. यात जैश-ए-मोहम्मद या दहशतवादी संघटनेच्या तळाला लक्ष्य करण्यात आले होते. बालाकोटमध्ये करण्यात आलेल्या कारवाईवर इटलीच्या पत्रकार फ्रान्सेसा मॅरिनो (Francesca Marino) यांनी मोठा खुलासा केला आहे. बालाकोटमधील स्थानिक सूत्रांच्या हवाल्याने 'भारताच्या हल्ल्यात जैशचे १३० ते १७० दहशतवादी मारले गेले. यात उपचारादरम्यान मरण पावलेल्या दहशतवाद्यांचाही समावेश आहे. पाकच्या लष्करी कॅम्पच्या रुग्णालयात अद्यापही सुमारे ४५ जणांवर उपचार सुरू आहेत. उपचारांदरम्यान २० जण मरण पावले,' अशी माहिती मॅरिनो यांनी लिहिली आहे.

'उपचारांनंतर जे दहशतवादी बरे झाले, त्यांना पाकिस्तानी लष्कराने स्वतःच्या ताब्यात ठेवले आहे. त्यांना रुग्णालयातून डिस्चार्ज देण्यात आलेला नाही,' असे मॅरिनो यांनी म्हटले आहे. मॅरिनो यांनी अनेक आठवडे शोध घेतल्यानंतर सूत्रांच्या माध्यमातून महत्त्वाची माहिती संकलित केली आहे. 'ठार झालेल्या दहशतवाद्यांपैकी ११ प्रशिक्षक होते. मृतांमध्ये काही बॉम्ब बनवणे आणि हत्यारे चालवण्याचे प्रशिक्षण देणारेही लोक होते,' अशी माहिती त्यांनी दिली आहे.

दहशतवाद्यांच्या कुटुंबीयांना दिली भरपाई

मॅरिनो यांच्या माहितीनुसार मारल्या गेलेल्या दहशतवाद्यांची माहिती गुप्त ठेवण्याचे पूर्ण प्रयत्न केले जात आहेत. 'ज्या कुटुंबांमधील लोक या हल्ल्यात मारले गेले, त्यांच्याविषयी कोणतीही माहिती बाहेर 'लीक' होऊ नये, यासाठीही जैश-ए-मोहम्मदने पूर्ण बंदोबस्त केला आहे. मृतांच्या घरी जाऊन जैश संघटनेच्या इतर दहशतवाद्यांनी नुकसान भरपाईदेखील दिली आहे.' २६ फेब्रुवारीच्या कारवाईचा उल्लेख करताना 'भारतीय वायू सेनेने पहाटे साडेतीन वाजता हल्ला केला. मला मिळालेल्या माहितीनुसार, शिंकयारी लष्करी कॅम्पहून सेनेची एक तुकडी घटनास्थळी पोहोचली,' अशी माहिती मॅरिनो यांनी दिली.

एअर स्ट्राइकनंतर भारताच्या नॅशनल टेक्निकल रिसर्च ऑर्गनायझेशनने (NTRO) एका अहवालात एअर स्ट्राइकच्या वेळी बालाकोटमध्ये जवळपास ३०० मोबाइल नेटवर्क सक्रिय होते. नुकतेच संयुक्त राष्ट्रांच्या सुरक्षा समितीने (UNSC) जैश-ए-मोहम्मदचा म्होरक्या अजहर मसूद याला आंतरराष्ट्रीय दहशतवादी घोषित केले. मसूद आजारी असल्याने एका लष्करी रुग्णालयात उपचार घेत असल्याच्या बातम्या समोर आल्या आहेत. पाक मीडियामध्ये पाकच्या परराष्ट्र मंत्र्यांनीही मसूद आजारी असल्याचे सांगितले होते.

बालोकोट हल्ला हा भारतीय वायुसेनेने गुप्तचरांनी दिलेल्या माहितीनुसार विना-लष्कर कारवाई होती. या कारवाईच्या दुसऱ्या दिवशी पाकिस्तानने भारतीय वायुसीमेचे उल्लंगन करत भारतीय लष्कराच्या अनेक तळांना लक्ष्य केले होते. प्रत्युत्तरादाखल केलेल्या कारवाईदरम्यान भारताचे मिग-२१ कोसळले होते. त्याचे पायलट अभिनंदन वर्धमान पॅराशूटच्या साहाय्याने बाहेर पडले. मात्र, ते पाकव्याप्त काश्मीर जाऊन पोहोचले होते. आंतरराष्ट्रीय दबावानंतर पाकने सुमारे ६० तासांनंतर त्यांना मुक्त केले होते. या घटना घडल्यापासून भारत-पाक संबंधांमध्ये तणाव निर्माण झाला आहे.

याआधी १४ फेब्रुवारीला जम्मू-कश्मीरमधील पुलवामा येथे जैशने सीआरपीएफ जवानांवर आत्मघातकी बॉम्ब हल्ला केला होता. यात ४० जवानांना प्राण गमवावे लागले होते. मीडियात बालाकोट एअर स्ट्राइकला 'पुलवामा हल्ल्याचा बदला' असे मथळे प्रकाशित झाले होते. पुलवामा हल्ल्याचा संयुक्त राष्ट्रांनीही निषेध केला होता.

NOTE: पत्रकार फ्रान्सेसा मॅरिनो (Francesca Marino) यांनी http://www.stringerasia.it या वेबसाइटवर ही बातमी लिहिली आहे.