पाटणा - लोकसभा निवडणुकीची प्रक्रिया सुरू झाली असून पहिल्या टप्प्यातील मतदानासाठी मोजकेच दिवस शिल्लक राहिले आहेत. अशा परिस्थितीत बिहारमध्ये मात्र, भाजपच्या कार्यकर्त्यांमध्ये दुफळी माजलेली दिसते. पाटणा साहिब लोकसभा मतदार संघामध्ये आपल्या आवडत्या नेत्याला उमेदवारी न मिळाल्यामुळे भाजपच्या दोन गटामध्ये तुफान हाणामारी झाली. त्याचा एक व्हिडिओही व्हायरल झाला आहे.
पाटणा साहिब या मतदार संघातून केंद्रीय कायदा मंत्री रविशंकर प्रसाद यांना भाजपने उमेदवारी दिली आहे. २०१४च्या निवडणुकांमध्ये आर. के. सिन्हा यांनी येथून निवडणूक जिंकली होती. मात्र, यावेळी भाजपने रविशंकर प्रसाद यांना तिकीट दिल्यामुळे भाजपमध्ये २ गट तयार झाले आहेत.
आज पाटणा साहिब विमानतळावर रविशंकर प्रसाद आले तेव्हा त्यांच्या समर्थकांनी गर्दी केली होती. त्यावेळी त्यांच्या नावाच्या मोठ-मोठ्या घोषणाही देण्यात आल्या. मात्र, त्याच वेळी विमानतळावर आर. के. सिन्हा यांचे समर्थक पोहोचले. त्यानंतर घोषणाबाजीमध्ये दोन्ही नेत्यांच्या समर्थकांमध्ये हाणामारी झाली. यावेळी विमानतळ परिसरात गोंधळ उडाला होता.
पाटणा साहिब येथून तिकीट न मिळाल्यामुळे आर. के. सिन्हा यांचे समर्थक नाराज आहेत. त्यामुळे त्यांनी रविशंकर प्रसाद यांच्या समर्थकांवर हल्ला चढवला. यावेळी तेथे उपस्थित पोलिसांनी गर्दीवर ताबा मिळवण्याचा प्रयत्न केला. तर, अतिरिक्त पोलीस दलही घटनास्थळी तैनात करण्यात आले आहे.
