सॅप्पोरो - रुग्णालयात यावे न लागता रुग्ण असेल, त्या ठिकाणी जलद गतीने आणि मोठ्या प्रमाणात रोगांसंबंधीच्या चाचण्या करण्यासाठी जपानमधील संशोधकांनी 'पोर्टेबल अॅनालायझर' विकसित केला आहे. याच्याद्वारे त्यांनी रक्ताच्या सीरममधील अँटी-एव्हियन इन्फ्लूएंझा व्हायरस अँटीबॉडी (प्रतिजैविके) 20 मिनिटांत शोधण्यात यश मिळवले होते. हे तंत्रज्ञान एखादा योग्य रिएजन्ट (अभिकर्मक) विकसित केल्यानंतर सार्स-CoV-2 यांच्याविरोधात लढणारी प्रतिजैविके शोधून काढण्यासाठी वापरता येऊ शकते.
होक्काइडो विद्यापीठाच्या ग्रॅज्युएट स्कूल ऑफ केमिकल सायन्स अँड इंजिनिअरिंगमधील डॉक्टरेटचा विद्यार्थी कीन निशियामा आणि विद्यापीठाचे अभियांत्रिकीचे प्राध्यापक मनाबू टोकेशी यांच्या अभ्यासगटाने हे तंत्रज्ञान विकसित केले. त्यांनी मोठ्या प्रमाणात, सहजपणे आणि निवडक प्रतिजैविके शोधण्यास सक्षम असलेल्या कुठेही सहजपणे नेता येण्याजोगे विश्लेषक उपकरण विकसित केले. या उपकरणाचे वजन केवळ 5.5 किलो आहे.
एव्हीयन इन्फ्लूएन्झा हा पोल्ट्रीद्वारे होणारा रोग असून तो ‘इन्फ्लूएंझा ए’ या विषाणूच्या संसर्गामुळे होतो. यावरील प्रतिजैविके शोधून काढणारे हे उपकरण, जगभरात हाहाकार माजवणाऱ्या कोरोना विषाणूविरोधातील प्रतिजैविके शोधण्यास मदत करेल, असे टोकेशी म्हणाले. या विषाणूभोवती असलेले प्रोटीनच्या कवचाचे तुकडे केल्यावर त्यांचा रिएजन्ट म्हणून वापर करून हे उपकरण 'अँटी-कोरोनाव्हायरस अँटीबॉडीज' शोधू शकेल, असे ते म्हणाले.
या उपकरणाच्या मदतीने एच 5 एव्हीयन इन्फ्लूएन्झा या विषाणूविरोधातील प्रतिजैविके (अँटी-एच 5 एव्हीयन इन्फ्लूएन्झा व्हायरस अँटीबॉडी) केवळ 20 मिनिटांत शोधून काढण्यात आली. यासाठी रक्तातील 2 मायक्रोलिटर सीरमचा वापर करण्यात आला. यामुळे इतर रोगांच्या चाचण्याही यावर करता येतील. योग्य रिएजन्ट शोधण्यात यश मिळाले तर, आम्ही विकसित केलेल्या या उपकरणाच्या मदतीने इतरही आजारांवरील प्रतिजैविके तयार करता येतील. याच गटाने यापूर्वी मायकोटॉक्सिन आणि इतर काही औषधी घटक तयार केले होते.
