पिथोरागड - भारताचा भूप्रदेश नेपाळच्या नकाशात समावेश करण्याचा कायदा संसदेत मंजूर झाल्यानंतर नेपाळच्या लष्कर प्रमुखांनी सीमेवरील कालापाणी परिसराची पाहणी केली. नेपाळने भारताच्या हद्दीतील लिपूलेक, कालापाणी आणि लिंपियाधूरा प्रदेश त्यांच्या नकाशात दाखवले आहेत. यानंतर सीमेवरील हालचाली वाढल्या आहेत.
बुधवारी नेपाळचे लष्कर प्रमुख पुरन चंद्रा थापा आणि नेपाळ आर्मड फोर्सेसचे महासंचालक शैलेंद्र सवानल यांनी कालापाणी परिसरातील दारचूला भागातील लष्करी चौकीला भेट दिली. नुकतेच नव्याने तयार करण्यात आलेल्या चांग्रु चौकीचीही पाहणी नेपाळने केली. परिसराची पाहणी केल्यानंतर या भागाचा हवाई सर्व्हे केला. दोन्ही देशांमध्ये सीमा वाद सुरू झाल्यानंतर पहिल्यांदाच नेपाळच्या लष्करप्रमुखांनी विवादीत भागाचा दौरा केला.
नेपाळच्या लष्करप्रमुखांच्या भेटीमुळे भारतीयांच्या भुवया उंचावल्या आहेत. लिपूलेक, कालापाणी आणि लिंपियाधुरा भागावर नेपाळने दावा सांगितल्यानंतर या परिसरातील सुरक्षाही वाढवली आहे. त्यामुळे भारतीय सुरक्षा दलांना हाय अलर्ट देण्यात आला आहे. सीमा सुरक्षा बलाकडून परिसरात गस्त वाढविण्यात आली असून कालापाणी नदीवर जवान लक्ष ठेवून आहेत.
भारत नेपाळ सीमेवर सध्या शांतता असल्याचे सीमा सुरक्षा दलाच्या 11 व्या बटालियनचे कमांडंट महेंद्र प्रताप यांनी सांगितले. जुलीजीबी आणि कालापाणी भागात जवान तैनात करण्यात आले असून सर्वांना सतर्कतेचा इशारा देण्यात आला आहे. नेपाळच्या लष्कराच्याही आम्ही संपर्कात आहोत, असे प्रताप यांनी सांगितले.
कधी सुरू झाला वाद?
भारताने लिपूलेक परिसरात 80 किमी लांब पल्ल्याच्या रस्त्याचे उद्धाटन केले. यास नेपाळने विरोध दर्शवला. यातील 26 किमीचा रस्ता नेपाळच्या हद्दीत असल्याचा दावा नेपाळने केला आहे. तसेच उत्तराखंड राज्यातील सीमापरिसरात लष्करी चौक्या उभारण्यास नेपाळने सुरुवात केली आहे. भारताने नेपाळचे सर्व दावे खोडून काढले आहेत.
