नवी दिल्ली - सध्या परतीच्या मान्सूनने काही राज्यात धुमाकूळ घातला आहे. अरबी समुद्रात आज(शनिवार) कमी दाबाचा पट्टा निर्माण झाला आहे. मात्र, हा कमी दाबाचा पट्टा भारताच्या पश्चिम किनाऱ्यापासून दुर जात असल्याचे भारताच्या हवामान खात्याने सांगितले. त्यामुळे पश्चिम किनाऱ्यावरील वादळाचा धोका टळला आहे.
हा कमी दाबाचा पट्टा पुढील ४८ तासांत आणखी पश्चिमेकडे म्हणजे भारताच्या पश्चिम किनाऱ्यापासून दुर जाण्याची शक्यता हवामान खात्याने वर्तवली आहे. त्यामुळे भारताच्या पश्चिम किनाऱ्यावर वादळाचे कोणतेही दुष्परिणाम होणार नाहीत. मात्र, मच्छिमारांना मध्य आणि उत्तर अरबी समुद्रात मासेमारीला जाण्यापासून सावधानतेचा इशारा दिला आहे. पुढील २४ तासात गुजरातमधील कच्छ आणि सौराष्ट्र भागात हलका ते मध्यम स्वरुपाचा पाऊस पडण्याची शक्यताही हवामान विभागाने वर्तवली आहे.
पूर्व-मध्य आणि ईशान्य अरबी समुद्र १७ आणि १८ ऑक्टोबरला खुप जास्त ते मध्यम प्रमाणात खवळलेला असू शकतो, असा अंदाज हवामान विभागाने वर्तविला आहे.
नुकतेच बंगालच्या उपसागरात निर्माण झालेल्या कमी दाबाच्या पट्टयाने तेलंगणा, कर्नाटक, महाराष्ट्र आणि आध्रप्रदेश राज्यांना फटका बसला. तेलंगणा राज्यात पुरस्थिती निर्माण झाली होती. यात ५० पेक्षा जास्त नागरिकांचा मृत्यू झाला. तर मुसळधार पावसाने शेतीचे अतोनात नुकसाने झाले. महाराष्ट्रातील सोलापूर, पुणे, रायगड, रत्नागिरी, उस्मानाबाद, अहमदनगर, पालघर, सांगली तसेच पश्चिम किनाऱ्यावरील जिल्ह्यांना पुराचा फटका बसला.
