बंगळुरू - कर्नाटकमधील राजकीय गोंधळाच्या पार्श्वभूमीवर, कर्नाटकमधील भाजपच्या आमदारांनी तणावमुक्तीसाठी योग कार्यशाळेचा अनुभव घेतला. हे आमदार सध्या रामदा हॉटेलमध्ये राहत आहेत. हॉटेलच्या लश गार्डनमध्ये एका प्रशिक्षकाच्या मार्गदर्शनाखाली या आमदारांनी विविध योगासने केली.
याआधी १० जुलै रोजी धर्मनिरपेक्ष जनता दलाच्या काही आमदारांनी देखील गॉल्फशायर क्लब येथे तणावमुक्तीसाठी अशाच एका योग कार्यशाळेचा अनुभव घेतला होता. काही ट्रॅव्हल वेबसाईट्सच्या मते, याठिकाणी राहण्यासाठी एका रात्रीसाठी १५ हजार मोजावे लागतात.
जेडी(एस)ने या महिन्याच्या सुरुवातीला बंगळुरुपासून २५० किलोमीटर दूर असलेल्या मदिकेरीमध्ये १० बंगले, १५ डिलक्स रुम्स आणि १० कॉटेजेस तीन दिवसांसाठी बुक केले होते.
काँग्रेसच्या १३ आणि जेडी(एस)च्या ३ अशा एकूण १६ आमदारांच्या राजीनाम्यानंतर, अवघ्या तेरा महिन्यातच कर्नाटक सरकार कोसळण्याच्या स्थितीत आले. त्यानंतर हे सर्व सत्र सुरु झाले.
कर्नाटकचे मुख्यमंत्री कुमारस्वामी सरकारवर बहुमत सिद्ध करण्याचा दबाव कायम आहे. यासाठी त्यांना शुक्रवारी सायंकाळी सहा वाजेर्यंतची मुदत देण्यात आली होती. ही आणि याआधीचीही मुदत कुमारस्वामी सरकारला पाळता आली नाही. त्यामुळे आता आज (सोमवार दि. २२ जुलै) कर्नाटक सरकारला आपले बहुमत सिद्ध करावे लागणार आहे. कर्नाटक राज्य विधानसभेत एकूण २२५ सदस्यसंख्या आहे. बहुमत सिद्ध करण्यासाठी ११३ पेक्षा अधिक सदस्यसंख्या आवश्यक आहे.
