श्रीगंगानगर - जम्मू-काश्मीरला विशेष दर्जा देणारे आर्टिकल 370 हटवण्याच्या केंद्रातील मोदी सरकारच्या निर्णयामुळे अनेक मार्ग खुले झाले आहेत. या निर्णयामुळे केवळ जम्मू-काश्मीरला जाणेच शक्य होणार नाही तर, तेथे राहणेही शक्य होणार आहे. आर्टिकल ३७० आणि आर्टिकल ३५ ए हटवण्याचे पाऊल मोदी सरकारने उचलल्यानंतर लोकांचा दृष्टीकोन बदलू लागला आहे. याचेच पहिले उदाहरण जम्मूची कन्या श्रीगंगानगरची सून बनल्याने पहायला मिळत आहे.
काश्मीरमधील तरुणींचे भारताच्या इतर भागातील तरुणांशी विवाहबंध जुळल्यामुळे काश्मीर आणि इतर ठिकाणच्या संस्कृतींना एकमेकांच्या सुरात सूर मिसळण्याची संधी मिळणार आहे.
प्रेमाच्या आड येत होते आर्टिकल 370... हटवल्यानंतर झाले लग्न
श्रीगंगानगर येथील तरुणाची जम्मू-काश्मीरच्या तरुणीशी दिल्लीत ओळख झाली. आर्टिकल 370 मुळे मागील २ वर्षांपासून असलेले प्रेमसंबंधांचे विवाहात परिवर्तन होण्यास अडथळा येत होता. आता एक देश एक संविधान झाल्यानंतर दोन प्रेमींमधील दुरावा संपला आहे. आर्टिकल 370 आणि 35 ए मुळे येणाऱ्या समस्या आता संपल्या आहेत. अक्षय अरोरा आणि कामिनी राजपूत असे या नवविवाहित तरुण-तरुणीचे नाव आहे.
दिल्लीत जमले प्रेम
२ वर्षांपूर्वी अक्षय दिल्लीत नोकरी करत होता. त्यावेळेस त्याची जम्मूच्या कामिनीशी ओळख झाली. ती जम्मू येथेच शिक्षण घेत होती. सुट्टीला दिल्लीत तिच्या आत्याकडे आली होती. हळूहळू दोघांच्या भेटीचे प्रेमात रूपांतर झाले. दोघांच्या जाती भिन्न आहेत. कामिनी बाह्मण राजपूत आहे तर अक्षय हा अरोरा आहे. मात्र, ही अडचण नव्हतीच. आर्टिकल ३७० मधील तरतुदी खरा अडथळा ठरत होत्या. आता ही अडचण दूर झाल्यामुळे दोघे प्रेमी आणि त्यांची कुटुंबे जवळ आली.
विवाहनोंदणी आंतरराज्यीय विशेष कायद्यांतर्गत झाली
श्रीगंगानगरमध्ये हा पहिलाच क्षण आहे, जेव्हा येथे जम्मू-काश्मीरची कन्या येथील सून बनली आहे. जिल्हाअधिकाऱयांनी या लग्नावर शिक्कामोर्तब केले. त्यांची विवाहनोंदणी आंतरराज्यीय विशेष कायद्यांतर्गत झाली. दोघेही आता त्यांचे स्वप्न पूर्ण झाल्यामुळे खूश आहेत. सध्या अक्षय श्रीगंगानगर येथे आई-वडिलांसह कपड्यांचा व्यवसाय करतो. ऑक्टोबरमध्ये होणाऱ्या रिसेप्शनमध्ये दोन्ही कुटुंबीयांचे नातेवाईकही एकमेकांची भेट घेऊ शकतील.
