लखनौ - तकरोही इंदिरानगर येथे घराला लागलेल्या आगीत एकाच कुटुंबातील ५ जणांचा होरपळून मृत्यू झाल्याची घटना घडली आहे. या घराचा वापर गॅस ठेवण्याचे गोदाम म्हणुन केला जात होता. घरात शॉर्ट सर्किट झाल्यामुळे ही आग लागली. मोठ्या प्रमाणात गॅसचा साठा असल्याने आगीचा भडका उडाला. त्यामुळे आतील लोकांना बाहेर पडण्याची संधी मिळाली नाही.
मंगळवारी रात्री १२ ते १ च्या दरम्यान टी. आर सिंह यांच्या घराला आग लागली. अचानक लागलेल्या आगीमुळे घरात झोपलेल्या ५ जणांना बाहेर पडण्याची संधी मिळाली नाही. शेजारच्या लोकांनी त्यांना हाका मारुन उठवण्यचा प्रयत्न केला परंतु, सर्वजण धुरामुळे बेशुद्ध पडले होते. रात्री ३ वाजता अग्निशमन दलाचे जवान आणि पोलीस घटनास्थळी पोहचले.
घरामध्ये जाण्यासाठी एकच मार्ग असल्यामुळे आग विझवताना अडचण येत होती. त्यामुळे मागील बाजूने भिंत पाडून आग विझवली. यावेळी घरातून ५ जणांचे मृतदेह बाहेर काढण्यात आले. लखनऊ मधील इंदिरानगर हा विकासपासून वंचित भाग आहे. या भागात अशा घटना कायमच घडत असतात.
घरात सगळीकडे गॅस सिंलेडर आणि शेगडया
टी. आर. सिंह यांचा गॅस विक्रीचा मोठा व्यवसाय होता. ते घराचा वापर गोडावून म्हणुन करत होते. घरात सगळीकडे गॅसचे सामान होते. त्यामुळे आग विझवताना अडचणी येत होती, असे अग्निशमन दलाचे अधिकारी विजय कुमार सिंह यांनी सांगितले.
