हैदराबाद - महाराष्ट्रात आज (मंगळवार) कोरोनाचे 5 हजार 134 नवीन रुग्णांचे निदान झाले असून, सध्या राज्यात 89 हजार 294 रुग्णांवर उपचार सुरू आहेत... राष्ट्रवादी काँग्रेसचे अध्यक्ष शरद पवार यांनी विरोधकांच्या 'त्या' टिकेला उत्तर दिले आहे... अंतिम वर्षाच्या परीक्षा घेणे म्हणजे विद्यार्थ्यांच्या जीवाशी खेळ असल्याचे सांगत उदय सामंतांनी केंद्राला पत्र लिहिले आहे... ब्राझीलचे पंतप्रधान जैर बोल्सोनारो यांना कोरोनाची लागण झाल्याचे स्पष्ट झाले आहे... काँग्रेस नेत्या आणि पूर्व उत्तर प्रदेशच्या सचिव प्रियंका गांधी यांनी राज्यातील कायदा सुव्यवस्थेवरून मुख्यमंत्री योगी आदित्यनाथ यांच्यावर निशाणा साधला आहे... यासह राज्यातील आणि देश-विदेशातील महत्वाच्या घडामोडी वाचा...
मुंबई - आज कोरोनाच्या ५१३४ नवीन रुग्णांचे निदान झाले असून, सध्या राज्यात ८९ हजार २९४ रुग्णांवर उपचार सुरू आहेत. आजपर्यंत तपासण्यात आलेल्या ११ लाख ६१ हजार ३११ नमुन्यांपैकी २ लाख १७ हजार १२१ नमुने पॉझिटिव्ह (१८.६९ टक्के) आले आहेत. राज्यात ६ लाख ३१ हजार ९८५ लोक होम क्वारंटाईनमध्ये आहेत. सध्या ४५ हजार ४६३ लोक संस्थात्मक क्वारंटाईनमध्ये आहेत.राज्यात आज २२४ कोरोनाबाधित रुग्णांचा मृत्यू झाला आहे.
सविस्तर वाचा - राज्यात दिवसभरात 5 हजार 134 नवे कोरोनाबाधित; तर 224 मृत्यू
नागपूर : हत्येचा प्रकरणात शिक्षा भोगत असलेल्या अंडरवर्ल्ड डॉन अरुण गवळीला पुन्हा एकदा न्यायालयाने पॅरोल मंजूर केला आहे. गेल्या महिन्यातच तो पॅरोल पूर्ण करून नागपूर कारागृहात परतला होता. त्यावेळी सुद्धा गवळीच्या पॅरोलला दोन वेळा मुदतवाढ देण्यात आली होती. मात्र तिसऱ्यांदा पॅरोलला मुदतवाढ मिळावी या करिता त्याने न्यायालयात अर्ज दाखल केला होता. तेव्हा न्यायालयाने गवळीचा अर्ज नामंजूर केल्याने तो जून महिन्याच्या सुरुवातीला नागपूर मध्यवर्ती कारागृहात परत आला होता. आता पुन्हा त्याने पॅरोलसाठी न्यायालयात अर्ज केला तेव्हा न्यायालयाने त्याचा अर्ज मंजूर करत २८ दिवसांची रजा दिली आहे.
सविस्तर वाचा - अंडरवर्ल्ड डॉन अरुण गवळीला पुन्हा २८ दिवसांचा पॅरोल मंजूर
पुणे - सरकारवर पवार नाराज आहेत असे विरोधक बोलतात, तसे काहीही नाही. राज्यातील समस्यांवर विचार करतो तसेच चर्चेसाठी मातोश्रीवर गेल्याने कमीपणा वाटत नाही, असे सांगत राष्ट्रवादी काँग्रेसचे अध्यक्ष शरद पवार यांनी विरोधकांच्या टिकेला उत्तर दिले आहे. शरद पवारांना या वयात मातोश्रीवर चकरा माराव्या लागतात हे बरोबर नाही, अशी टीका भाजप प्रदेशाध्यक्ष चंद्रकांत पाटील यांनी केली होती. त्याला शरद पवारांनी उत्तर दिले. तसेच चंद्रकांत पाटील यांना चिंता वाटत असेल, मात्र मला मातोश्रीवर जाण्यात कमीपणा वाटत नाही, असे पवार म्हणाले. ते पुण्यात बोलत होते.
सविस्तर वाचा - चर्चेसाठी मातोश्रीवर गेल्याने कमीपणा वाटत नाही, शरद पवारांचे चंद्रकात पाटलांना प्रत्युत्तर
लंडन : गुरुवारपासून लंडनमध्ये सुरू होत असलेल्या 'इंडिया ग्लोबल वीक २०२०' मध्ये पंतप्रधान मोदी भाषण करणार आहेत. या परिषदेच्या उद्घाटनप्रसंगी ते जगाला संबोधित करतील. भारतातील व्यापार आणि परराष्ट्र गुंतवणूकीसंबंधी विषयावर ते भर देणार असल्याची शक्यता व्यक्त करण्यात येत आहे. यासोबतच, परराष्ट्र व्यवहार मंत्री एस. जयशंकर, रेल्वे मंत्री पियुष गोयल, नागरी उड्डाण मंत्री हरदीप सिंग पुरी, माहिती व तंत्रज्ञान मंत्री रवीशंकर प्रसाद आणि कौशल्य विकास मंत्री महेंद्रनाथ पांडे यांचीही भाषणे या परिषदेमध्ये होणार आहेत.
सविस्तर वाचा - 'इंडिया ग्लोबल वीक २०२०' : पंतप्रधान मोदी जगाला करणार संबोधित..
मुंबई - राज्यातील कायदा व सुव्यवस्था भक्कम करण्याबरोबरच पोलीस दलावरील कामाचा ताण कमी करण्यासाठी राज्यातील पोलीस शिपाई संवर्गात दहा हजार तरुणांची भरती करण्याचा निर्णय घेण्यात आला आहे. याचा फायदा शहरी व ग्रामीण तरुणांना होईल, त्यांना पोलीस दलात सेवेची संधी मिळेल, अशी माहिती उपमुख्यमंत्री अजित पवार यांनी दिली. नागपूरमधील काटोल येथे राज्य राखीव पोलीस दलाच्या महिला बटालियनची स्थापना करण्याचा निर्णय घेण्यात आल्याचेही उपमुख्यमंत्र्यांनी सांगितले.
सविस्तर वाचा - खूशखबर; राज्यात पोलिसांच्या 10 हजार जागा भरणार
मुंबई - राज्यात कोरोनाची परिस्थिती लक्षात घेता केंद्र सरकार आणि विद्यापीठ अनुदान आयोगाने राज्यातील अंतिम वर्षाच्या परीक्षा संदर्भात जो निर्णय घेतला आहे, तो निर्णय विद्यार्थ्यांच्या हिताच्या विरोधात जाईल आणि विद्यार्थ्यांच्या जीवाशी खेळण्यासारखे होईल, असे सांगत उच्च व तंत्रशिक्षण मंत्री उदय सामंत यांनी केंद्रीय मनुष्यबळ विकास मंत्री रमेश पोखरियाल यांना पत्र लिहिले आहे. सामंत यांनी पत्रात राज्यातील एकूणच परिस्थितीचा अंदाज आणि त्यातून उद्भवणारी परिस्थिती नमूद करत, या परीक्षा घेणे किती धोक्याचे होऊ शकते, या संदर्भातील माहिती दिली आहे. तसेच ही परीक्षा घेणे बंधनकारक करण्यात येऊ नये, अशी विनंती त्यांनी केली आहे.
सविस्तर वाचा - अंतिम वर्षाच्या परीक्षा घेणे म्हणजे विद्यार्थ्यांच्या जीवाशी खेळ; उदय सामंतांचे केंद्राला पत्र
नवी दिल्ली - भारतात कोरोनाचा प्रादुर्भाव वाढल्यानंतर मार्च महिन्यापासून सर्व शाळा, महाविद्यालये आणि विद्यापीठे बंद आहेत. विद्यार्थ्यांच्या आरोग्यास धोका असल्याने केंद्रीय माध्यमिक शिक्षण मंडळाने(सीबीएसई) 10 वी 12 वीच्या परिक्षाही रद्द केल्या आहेत. आता कोरोनामुळे झालेले नुकसान भरून काढण्यासाठी शैक्षणिक वर्ष 2020-21 मध्ये 9 वी ते 12 वी च्या 30 टक्के अभ्यासक्रमात कपात करण्यात आली आहे. केंद्रीय मानव संसाधन मंत्री रमेश पोखरियाल यांनी आज(मंगळवारी) ही माहिती दिली.
सविस्तर वाचा - कोरोनामुळे विद्यार्थ्यांना दिलासा... सीबीएसईनं 9 वी ते 12 वीच्या अभ्यासक्रमात केली कपात
ब्राझिलिया : ब्राझीलचे पंतप्रधान जैर बोल्सोनारो यांना कोरोनाची लागण झाल्याचे स्पष्ट झाले आहे. पंतप्रधानांनी स्वतःच याबाबत माहिती दिली. पत्रकारांशी बोलत त्यांनी याबाबत माहिती दिली. देशाची राजधानी ब्राझिलियामध्ये त्यांनी पत्रकार परिषद घेतली होती. यावेळी त्यांनी मास्कही लावला होता. "मी सुदृढ दिसतो आहे. मी इतका सशक्त आहे, की इथे चालत एक फेरीही मारू शकतो. मात्र, वैद्यकीय अधिकाऱ्यांनी दिलेल्या सल्ल्यामुळे मी तसे करणार नाही." असे बोल्सोनारो म्हणाले.
सविस्तर वाचा - ब्राझीलचे पंतप्रधान जैर बोल्सोनारो यांना कोरोनाची लागण..
नवी दिल्ली : पत्रकार विनोद दुवा यांच्याविरोधात सुरू असलेल्या देशद्रोह प्रकरणी त्यांना पुन्हा दिलासा मिळाला आहे. त्यांना अटकेपासून असलेले संरक्षण हे सर्वोच्च न्यायालयाने १५ जुलैपर्यंत वाढवले आहे. यासोबतच, या प्रकरणाच्या चौकशीसाठी विचारण्यात येणाऱ्या प्रश्नांना उत्तर देणे हे दुवांना बंधनकारक नसल्याचेही न्यायालयाने स्पष्ट केले आहे.
सविस्तर वाचा - पत्रकार विनोद दुवांना पुन्हा दिलासा; १५ जुलैपर्यंत होणार नाही अटक..
नवी दिल्ली - काँग्रेस नेत्या आणि पूर्व उत्तर प्रदेशच्या सचिव प्रियंका गांधी यांनी राज्यातील कायदा सुव्यवस्थेवरून मुख्यमंत्री योगी आदित्यनाथ यांच्यावर निशाणा साधला. गुन्ह्यांची आकडेवारी लपवण्याचे सोडून मुख्यमंत्री योगींनी दुसरे काही केले नाही, असे त्या म्हणाल्या. गुंड विकास दुबे आणि आणि त्याच्या साथीदारांनी कानपूर जिल्ह्यात पोलिसांवर गोळीबार केला. यामध्ये 8 पोलीस शहीद झाले. या घटनेनंतर राज्यात खळबळ उडाली आहे
सविस्तर वाचा - 'गुन्ह्यांची आकडेवारी लपवण्याचं सोडून मुख्यमंत्री योगींनी दुसरं केलंय तरी काय?'
