लखनौ - उत्तर प्रदेशातील शाहजहापूर येथे डबल डेकर बस उलटून अपघात झाला आहे. या अपघातात १५ प्रवासी जखमी झाले आहेत. यातील ५ जणांची प्रकृती गंभीर असल्याची माहिती समोर आली आहे. चालक मद्यधुंद अवस्थेत असल्यामुळे अपघात झाल्याची माहिती प्रवाशांनी दिली.
बस पानिपतवरून लखीमपूरला जात असताना हा अपघात झाला. सर्व जखमींना मेडिकल कॉलेज रुग्णालयात दाखल करण्यात आले आहे. महामार्ग क्रमांक २४ वरील सरोवर नगर हद्दीत हा अपघात घडला. रस्ता दुभाजकाला धडकून बस रसत्यावर पलटी झाली. अपघातापूर्वी चालकाने एका ढाब्यावर मद्य घेतल्याची माहिती प्रवाशांनी दिली.
याआधी उत्तर प्रदेशातील कनोज जिल्ह्यात डबल डेकर बसचा अपघात झाला होता. यामध्ये बसने पेट घेतल्याने १० प्रवाशांचा जळून मृत्यू झाला होता. या घटनेनंतही राज्यामध्ये अपघातांचे सत्र सुरूच आहे. अवैधरित्या बस चालकांवर कारवाई करण्यास प्रशासन कमी पडत असल्याचा आरोप प्रवाशांनी केला आहे.
