देहराडून - देशभरात कोरोनाने धुमाकूळ घातला आहे. शासन, प्रशासन, पोलीस आणि आरोग्य विभाग कोरोनाचा प्रादुर्भाव रोखण्यासाठी युद्धपातळीवर प्रयत्न करत आहेत. महानगरपालिकेचे कर्मचारी आपला जीव धोक्यात घालून रुग्ण सापडलेल्या परिसरांसह शहरे आणि गावांचे निर्जंतुकीकरण करत आहेत. मात्र, देहराडून महानगरपालिकेला आपल्या स्वच्छता कर्मचाऱयांची काळजी नसल्याचे दिसते. येथील स्वच्छता कर्मचाऱयांना अतिशय निकृष्ट दर्जाचे मास्क देण्यात आले असून हातमोजे आणि सॅनिटायझर दिलेही गेले नाही.
तरीही हे 1 हजार 895 स्वच्छता कर्मचारी आपला जीव धोक्यात घालून नागरिकांची सेवा करत आहेत. हे कर्मचारी दररोज शहरातील प्रत्येक भाग स्वच्छ करुन निर्जंतूक करत आहेत. राज्य सरकार माध्यमांना तर सांगत आहेत की, स्वच्छता कर्मचाऱ्यांचे कौतुक करावे ते कमीच आहे. मात्र, त्यांच्या सुरक्षेची काळजी सरकार आणि प्रशासन घेताना दिसत नाही.
देहराडून महानगरपालिकेमध्ये एकूण 1 हजार 895 स्वच्छता कर्मचारी कार्यरत आहेत. यातील ७०० सेवेत कायम असलेले आहेत. १२० कर्मचारी मैला सफाईचे काम करतात तर ७५ रात्री काम करतात. ८०० कर्मचारी सफाईचे काम करतात तर २०० इतर कामे करतात. हे सर्व कर्मचारी कोरोना लॉकडाऊनच्या काळात शहरातील सफाईचे काम करतात. ५० मोठ्या वाहनांचा वापर करुन शहरातील प्रत्येक परिसर निर्जंतूक करत आहेत.
या सफाई कर्मचाऱयांना मास्क उपलब्ध करुन दिले गेले आहेत. मात्र, त्यांचा दर्जा निकृष्ट आहे. सफाई कामगारांना कोरोनाची बाधा होण्याची शक्यता लक्षात घेता त्यांना चांगल्या दर्जाचे मास्क मिळणे गरजेचे आहे. कर्मचाऱ्यांना देण्यात आलेले मास्क फक्त सहा तास सुरक्षित आहे, मात्र हे कर्मचारी कित्येक दिवस एकच मास्क वापरत आहेत, अशी माहिती सफाई मजदूर संघाच्या सोनू खैरवाल यांनी दिली.
