प्रयागराज(उ.प्र)- कावडधाऱ्यांच्या टाटा मॅजिक वाहनाला अपघात झाल्याने सुमारे २ डझन कावडधारी भाविक जखमी झाल्याची घटना उत्तर प्रदेशातील फूलपूरमध्ये घडली आहे. यातील २ कावडधाऱ्यांना रुग्णालयात हालविण्यात आले होते. मात्र त्यांचा वाटेतच मृत्यू झाला. तर इतर जखमींवर प्रयागराज येथील स्वरुपरानी रुगणालयात उपचार सुरू आहेत.
श्रावण सोमवार निमित्त गंगाजल आणण्यासाठी हे कावडधारी जौनपूर बादशाहपूर येथून मॅजिकने प्रयागराजकडे जात होते. दरम्यान, राणी तलावाजवळ पोहोचताच मॅजिक अनियंत्रित झाली आणि ती उलटली. यावेळी मॅजिकमध्ये असलेल्या जवळपास २४ कावडधारी गंभीररीत्या जखमी झाले. त्यातील दोन कावडधारी गंभीररित्या जखमी झाले होते. त्यांना उपचारासाठी तत्काळ प्रयागराज येथील रुग्णालयात हालविण्यात आले. मात्र, डॉक्टरांनी त्यांना मृत घोषित केले.
या घटनेनंतर प्रशासनाचा हलगर्जीपणा समोर आला आहे. घटनेनंतर जखमी कावडधारी प्रशासनाची मदत मिळावी म्हणून प्रयत्न करत होते. मात्र, कावडधाऱ्यांना मदत करण्यासाठी प्रशासनाचे अधिकारी एक तास उशिरा पोहोचले होते.
