नवी दिल्ली - दिल्ली विधानसभेच्या 70 जागांसाठी आज (शनिवारी) मतदान होत आहे. सकाळी 8 वाजता मतदानाला सुरुवात झाली. यावेळी अनेक नागरिकांनी आपला मतदानाचा हक्क बजावला आहे. उत्तर-पूर्वी जिल्ह्यातील बाबरपूर विधानसभा मतदारसंघात चक्क 108 वर्षांच्या आजीबाईने आपला मतदानाचा हक्क बजावला आहे. सीतारा जैन (वय 108) असे या आजीबाईचे नाव आहे.
बाबरपूर येथील महाविद्यालयाच्या शाळेत पोलिंग स्टेशन येथे या आजीबाईने मतदान केले. यावेळी त्यांनी अनेक लोकांना मतदान करण्यासाठी प्रेरित केले. मतदानस्थळी पोहोचल्यानंतर येथील संपूर्ण निवडणूक टीमने त्यांचे स्वागत केले. तर यावेळी निवडणुकीत अनेक बाबी प्रकर्षाने पहायला मिळत आहेत. काही ठिकाणी अनेक वृद्ध आपला मतदानाचा अधिकार बजावत आहेत. तर तेच पहिल्यांदा मतदान करणाऱ्या तरुणाईमध्ये उत्साह दिसून येत आहे.
हेही वाचा - LIVE : दिल्ली विधानसभेचे मतदान सुरू; सकाळी अकरा वाजेपर्यंत ६. ९६ टक्के मतदान
मतदानासाठी पार्श्वभूमीवर दिल्लीमध्ये चोख बंदोबस्त ठेवण्यात आला आहे. सुमारे 1 कोटी 47 लाखांहून अधिक नागरिक मतदानाचा हक्क बजावणार आहेत. मागच्या पाच वर्षांसाठी दिल्लीकरांनी आम आदमी पक्षाच्या हाती सत्ता दिली होती. आरोग्य, शिक्षण, वीज आणि मुलभूत सुविधा सुधारल्याचा दावा आम आदमी पक्षाने केला आहे. तर भाजपनेही दिल्लीकरांसाठी भरीव काम केल्याचा दावा केला आहे. या निवडणुकीत दिल्लीकर कोणाच्या पारड्यात बहुमत टाकतात, हे लवकरच समजेल.
