मुंबई कोरोना अद्याप पुर्णपने संपलेला नाही चाचण्यांचा वेग वाढला की आजही कोरोना रुग्णांची जास्त नोंद होताना पहायला मिळत आहे. यातच अधुन मधुन मंकी पाॅक्सचे रुग्ण सापडत असल्याचे समोर येत आहे. स्वाईन फ्लू सारख्या आजारामुळे त्रस्त असलेल्या शेकडो रुग्णांवर उपचार सुरु आहेत. व्हायरलच्या साथीचेही असेच आहे. वेगवेगळ्या आजाराला सगळेच तोंड देत असताना लहान मुलांमधे टोमॅटो फ्लू नावाचा नवा आजार समोर आला आहे. लहान मुलांमधे या रोगाची साथ पहायला मिळत आ0हे. त्यामुळे पालकांना आपल्या लहान मुलांची विशेष काळजी घ्यावी लागणार आहे.
काय आहे टोमॅटो फ्लू टोमॅटो फ्लू हा विषाणूजन्य संसर्गाचा एक सामान्य प्रकार असल्याचे सांगितले जाते, ज्यात पाच वर्षांखालील मुलांना ताप येतो. तसेच त्वचेवर पुरळ उठतात. फ्लूची लागण झालेल्या मुलांच्या शरीराच्या अनेक भागांवर फोड येतात, ज्याचा रंग सामान्यतः लाल असतो, म्हणून या आजाराला टोमॅटो फ्लू म्हणतात. सध्या केरळमधील कोल्लम जिल्ह्याच्या काही भागांमध्येच संसर्गाची नोंद झाली आहे, परंतु आरोग्य अधिकार्‍यांनी इशारा दिला आहे की जर उपाययोजना केल्या नाहीत तर संसर्ग इतर भागातही पसरू शकतो.
का होतो टोमॅटो फ्लू टोमॅटो फ्लूचे विशिष्ट कारण शोधण्यासाठी शास्त्रज्ञ अजूनही संशोधन करत आहेत. परंतु सध्या हा विषाणू संसर्गाचा एक प्रकार मानला जात आहे. डेंग्यू किंवा चिकुनगुनियाचा हा दुष्परिणाम असू शकतो, असेही काहींनी सुचवले आहे. शास्त्रज्ञांच्या म्हणण्यानुसार, त्याचा स्रोत हा व्हायरस आहे. परंतु तो कोणत्या विषाणूमुळे पसरत आहे किंवा कोणत्या विषाणूशी संबंधित आहे याबद्दल अद्याप माहिती समोर आलेली नाही.
संसर्ग होण्याची शक्यता केरळ मधे आतापर्यंत या विषाणूचे अनेक रुग्ण आढळले आहेत. आसपासच्या भागातही काही मुलांना टोमॅटो फ्लूचा संसर्ग झाला आहे. ६ मे रोजी भारतात टोमॅटो फ्लूची लागण झालेला पहिला रुग्ण सापडला होता. पाच वर्षांपेक्षा कमी वयाच्या ८२ मुलांना या आजाराचा संसर्ग झाल्याचे सांगण्यात येत आहे. या वयोगटात व्हायरल इन्फेक्शन सामान्य आहे. तसेच इतरांच्या संपर्कात आल्याने या रोगाचा संसर्ग होण्याची शक्यता वाढते. या आजारात हात, पाय आणि तोंडाच्या आजारासारखी लक्षणे दिसून येतात असेही तज्ञांनी म्हणले आहे.
रोगाची लक्षणे काय लहान मुलांना जेव्हा त्याचा त्रास होतो तेव्हा रुग्णाच्या त्वचेवर लाल रंगाचे फोड दिसतात, म्हणून याला टोमॅटो फ्लू असे म्हणतात. याच्या लक्षणांमध्ये ताप आणि सांधेदुखी यांचा समावेश होतो. याशिवाय उलट्या, जुलाब, डिहायड्रेशन, शरीरदुखी यांसारख्या समस्याही येतात. काही प्रकरणांमध्ये, अंगांच्या रंगातदेखील बदल दिसून आला आहे.
काय घ्यावी खबरदारी टोमॅटो फ्लू हा संसर्गजन्य रोग आहे. त्यामुळे हा रोग झालेल्या किंवा संशयित रुग्णापासून अंतर राखणे महत्वाचे आहे. जर एखाद्याला या आजाराची लक्षणे दिसली तर तर ५ ते ६ दिवस विलगीकरणात राहावे. हा आजार रोखण्याचा सर्वोत्तम मार्ग म्हणजे योग्य स्वच्छता राखणे, असे अभ्यासात म्हटले आहे. संक्रमित मुलाने खेळणी, कपडे, अन्न किंवा इतर वस्तू गैर-संक्रमित मुलांसोबत शेअर करणे टाळावे.
काय आहेत उपचार टोमॅटो फ्लूपासून दूर राहण्यासाठी डॉक्टर स्वच्छ राहण्याचा सल्ला देतात. हा विषाणू पाच वर्षांखालील मुलांसाठी अधिक असुरक्षित असल्याचे मानले जाते. तुमच्या मुलांमध्ये वरीलपैकी कोणतीही लक्षणे दिसल्यास, लवकरात लवकर डॉक्टरांशी संपर्क साधा. लहान मुले किंवा प्रौढ ज्यांना संसर्ग झाला आहे त्यांनी फोड फोडणे आणि खाजवणे टाळावे. जास्त पाणी प्या. जर एखाद्याला कोणतेही लक्षणे दिसले तर त्याचा अर्थ असा नाही की त्याला टोमॅटो ताप आहे.
टोमॅटो फ्लूची तपासणी टोमॅटो फ्लूचा प्रसार रोखण्यासाठी तामिळनाडू केरळ सीमेवर विशेष तपासणी केली जात आहे. आरोग्य कर्मचारी सर्व वाहनांची विशेषतः लहान मुलांची तपासणी करत आहेत. केरळमधील एका जिल्ह्यात टोमॅटो फ्लू नावाच्या आजाराचा प्रसार तपासण्यासाठी तामिळनाडूमधील आरोग्य कर्मचाऱ्यांचे पथक तामिळनाडू केरळ सीमेवरील वलयार मार्गे कोईम्बतूरला येणाऱ्या लोकांमध्ये ताप, खाज सुटणे आणि इतर लक्षणे आहेत का याची तपासणी करत आहेत. अंगणवाडीतील पाच वर्षांखालील बालकांची तपासणी करण्यासाठी २४ सदस्यीय पथक तयार करण्यात आल्याचे सांगण्यात येत आहे.
हेही वाचा COVID19 India आज 1 लाखाहून कमी सक्रिय कोरोना रुग्ण, 11539 संक्रमित
