नवी दिल्ली Lakshadweep Flight Booking : भारत आणि मालदीव यांच्यात सुरू असलेल्या वादाच्या पार्श्वभूमीवर लक्षद्वीपला सेवा देणारी एकमेव विमान कंपनी 'अलायन्स एअर'नं तेथे अतिरिक्त उड्डाणं सुरू केली आहेत. लक्षद्वीपला भेट देऊ इच्छिणाऱ्या प्रवाशांच्या संख्येत वाढ झाल्यामुळे या भारतीय विमान कंपनीनं कोची-अगत्ती-कोचीसाठी अतिरिक्त उड्डाणं सुरू केली. ही उड्डाणे आठवड्यातून दोन दिवस म्हणजे रविवार आणि बुधवारी चालतील, असं अलायन्स एअरच्या एका वरिष्ठ अधिकाऱ्यानं सांगितलं.
तिकिटांची प्रचंड मागणी : 'अलायन्स एअर' ही लक्षद्वीपमध्‍ये कार्यरत असलेली एकमेव एअरलाइन आहे. ती केरळमधील कोची आणि अगत्ती बेटांदरम्यान उड्डाणं भरते. तेथे लक्षद्वीपला सेवा देणारा प्रादेशिक विमानतळ आहे. ही एअरलाइन्स या बेटावर दररोज 70 आसनी विमानं चालवते. विमानं पूर्ण क्षमतेनं धावत असून मार्चपर्यंतची सर्व तिकिटं विकली गेली आहेत, असं विमान कंपनीच्या एका अधिकाऱ्यानं सांगितलं. आम्हाला फोन आणि सोशल मीडियावर तिकिटांबाबत अनेक प्रश्न येत आहेत. तिकिटांच्या प्रचंड मागणीनंतर या मार्गावर अतिरिक्त विमानसेवा सुरू करण्यात आली. आवश्यक असल्यास, फ्लाइटची वारंवारता वाढवली जाईल, असं या अधिकाऱ्यानं स्पष्ट केलं.
स्पाईसजेटही सेवा सुरू करेल : अलीकडेच, वार्षिक सर्वसाधारण सभेत, स्पाईसजेटचे सीईओ अजय सिंह यांनी देखील, एअरलाइनकडे लक्षद्वीपसाठी प्रादेशिक कनेक्टिव्हिटी स्कीम (RCS) अंतर्गत विशेष अधिकार आहेत आणि ते लवकरच लक्षद्वीपसाठी उड्डाणे सुरू करतील, अशी माहिती दिली होती. ट्रॅव्हल पोर्टल्सनुसार, भारत-मालदीव वादानंतर लोक पर्यटनासाठी लक्षद्वीपकडे वळत आहेत. यासाठी मोठ्या संख्येनं अर्ज देखील येत आहेत.
मोदींचं लक्षद्वीपला भेट देण्याचं आवाहन : लक्षद्वीप हा भारतातील सर्वात लहान केंद्रशासित प्रदेश आहे. पंतप्रधान नरेंद्र मोदी यांनी नुकतीच अरबी समुद्रातील या बेटाच्या भेटीची छायाचित्रं सोशल मीडियावर शेअर केली आणि लोकांना एकदा या बेटांना भेट देण्याचं आवाहन केलं. त्यानंतर ही बेटं प्रसिद्धीझोतात आली आहेत.
हे वाचलंत का :
