समस्तीपूर (बिहार) - जिल्ह्यातील दलसिंहसरायमध्ये अज्ञातांनी दिवाळीच्या रात्री एका चहा दुकानदाराच्या घरात घुसून अंधाधुंद गोळीबार केला. या गोळीबारात दोघांचा मृत्यू झाला तर, इतर अनेक जण गंभीर जखमी झाले आहेत. या घटनेमुळे परिसरात खळबळ उडाली आहे.
मृतामध्ये ६० वर्षीय महिला आणि एका ८ वर्षीय मुलाचा समावेश आहे. मिळालेल्या माहितीनुसार हा प्रकार १० हून अधिक जणांच्या टोळक्याने केला.
मिळालेल्या माहितीनुसार, दलसिंहसराय पोलीस स्टेशनच्या हद्दीत आयबी रोडवर चहा दुकानदार सुमीत कुमार राय यांचे घर आहे. सुमीत यांच्या घरात अचानक १०हून अधिक जण बंदूकीसह घुसले. त्यांनी अचानक गोळीबार सुरू केला. यात ६० वर्षीय महिला हिलिया देवी आणि ८ वर्षीय मुलगा अस्मित याला गोळी लागली. यात दोघांचाही जागीच मृत्यू झाला. या घटनेत तीन महिलांसह पाच जण गंभीर जखमी झाले आहेत. त्यांच्यावर रुग्णालयात उपचार सुरू आहेत.
या गोळीबारामागचे नेमके कारण स्पष्ट झालेले नाही. पण या घटनेमुळे परिसरात खळबळ उडाली आहे. नागरिकांमधून पोलीस प्रशासनाच्या कारभारावर प्रश्नचिन्ह उपस्थित केले जात आहे.
हेही वाचा - मुख्यमंत्रीपदी नितिश कुमार कायम; तर उपमुख्यमंत्रीपदाचा प्रसाद तारकिशोरांना
हेही वाचा - 'कार्यकर्तापद कोणी हिरावू शकत नाही', डावलल्याची सुशील कुमारांना खंत
