തമ്പാനൂർ പൊലീസ് സ്‌റ്റേഷന്‍ സംസ്ഥാനത്തെ മികച്ച പൊലീസ് സ്‌റ്റേഷന്‍

തിരുവനന്തപുരം: സംസ്ഥാനത്തെ ഏറ്റവും മികച്ച പൊലീസ് സ്‌റ്റേഷനുള്ള സംസ്ഥാന സര്‍ക്കാറിന്‍റെ പുരസ്‌കാരം ഇത്തവണ ലഭിച്ചിരിക്കുന്നത് തമ്പാനൂര്‍ പൊലീസ് സ്‌റ്റേഷന്. നഗര ഹൃദയത്തില്‍ ക്രൈം റേറ്റ് കൂടുതലുളള പരിധിയില്‍ പ്രവര്‍ത്തിച്ചിട്ടും ഈ നേട്ടം സ്വന്തമാക്കിയതിന്‍റെ സന്തോഷത്തിലാണ് ഇവിടത്തെ ഉദ്യോഗസ്ഥര്‍. സ്‌റ്റേഷന്‍ മാനേജ്‌മെന്‍റ്, പൊതുജനങ്ങളോടുള്ള സമീപനം, ക്രിമിനൽ കേസുകളിലെ അന്വേഷണം, കുറ്റകൃത്യം തെളിയിക്കല്‍, ജനമൈത്രി പൊലീസിങ്, ഓണ്‍ലൈന്‍ സംവിധാനങ്ങളിലെ മികവ്, ലഹരിമരുന്നിനെതിരെയുള്ള അന്വേഷണം എന്നിവയാണ് മികച്ച സ്റ്റേഷനെ തിരഞ്ഞെടുക്കാനുള്ള മാനദണ്ഡം. ഈ മാദണ്ഡങ്ങളിലെല്ലാം മികവ് തെളിയിച്ചാണ് തമ്പാനൂര്‍ സ്‌റ്റേഷൻ ഒന്നാമതെത്തിയത്. സ്‌റ്റേഷനുള്ളില്‍ ലൈബ്രറി, പരാതി നല്‍കാനെത്തുന്നവര്‍ക്ക് വിശ്രമിക്കാന്‍ മികച്ച സംവിധാനങ്ങള്‍, കൂടാതെ സൈബര്‍ പരാതികള്‍ അന്വേഷിക്കുന്നതിന് മികച്ച ടീം എന്നിവയും തമ്പാനൂര്‍ പൊലീസ് സ്‌റ്റേഷന് ഈ നേട്ടം നേടിക്കൊടുക്കാൻ ഇടയാക്കി. എസ്എച്ച്ഒ ഉള്‍പ്പെടെ 68 പേരാണ് തമ്പാനൂര്‍ സ്‌റ്റേഷനലുള്ളത്. ഇതില്‍ മൂന്ന് സബ് ഇന്‍സ്‌പെക്‌ടറും പത്ത് വനിതാ പൊലീസുകാരുമുണ്ട്. 2019ല്‍ മികച്ച് മൂന്നാമത്തെ പൊലീസ് സ്‌റ്റേഷനായി തമ്പാനൂരിനെ തിരഞ്ഞെടുത്തിരുന്നു.