രണ്ട് മാസത്തിനിടെ 14 അപകടങ്ങൾ, നാല് ജീവഹാനി ; മരണച്ചുഴിയായി ബൈസൺവാലി ചൊക്രമുടി റോഡ്

ഇടുക്കി : ചെമ്മണ്ണാർ - ഗ്യാപ്പ് റോഡിന്‍റെ തുടക്കഭാഗമായ ബൈസൺവാലി ചൊക്രമുടി ഭാഗത്ത് അപകടം പതിവാകുന്നു. കഴിഞ്ഞ ദിവസം കാക്കാകടയ്ക്ക്‌ സമീപം നിയന്ത്രണം നഷ്‌ടപ്പെട്ട ബൈക്ക് മറിഞ്ഞ് 27കാരൻ ദാരുണമായി മരിക്കാനിടയായി. 2 മാസത്തിനിടെ ഈ റോഡിൽ 14 അപകടങ്ങളിലായി 4 പേരാണ് മരിച്ചത്. മരിച്ചവരെല്ലാം ബൈക്ക് യാത്രികരാണ്. 

വഴി പരിചയമില്ലാതെ വരുന്ന ഡ്രൈവർമാർ ഓടിക്കുന്ന വാഹനങ്ങൾ ഇവിടെ അമിത വേഗതയിൽ പോവുകയും നിയന്ത്രണം നഷ്‌ടപ്പെട്ട് മറിയുകയുമാണ് ചെയ്യുന്നത്. ഗ്യാപ് റോഡില്‍ നിന്നും ബൈസണ്‍വാലി വരെയുള്ള ഏഴ് കിലോമീറ്റര്‍ ദൂരത്തിലാണ് അപകടങ്ങള്‍ പതിവായിരിക്കുന്നത്. 

ഇരുചക്രവാഹനങ്ങൾ ഈ റോഡിലൂടെ സൂക്ഷിച്ചുമാത്രമേ പോകാവൂവെന്ന മുന്നറിയിപ്പ് ബോർഡുകൾ ബൈസൺവാലി പഞ്ചായത്ത് എല്ലാ വളവുകളിലും സ്ഥാപിച്ചിട്ടുണ്ടെങ്കിലും ഇരുചക്ര വാഹനങ്ങളിൽ വരുന്നവർ ഇത് ശ്രദ്ധിക്കാറില്ല. അമിത വേഗതയും വാഹനം ഓഫ് ചെയ്‌ത് പോകുന്നതുമാണ് അപകടങ്ങൾക്ക് കാരണമെന്നും പ്രദേശവാസികൾ പറയുന്നു.

പുറത്ത് നിന്ന് വരുന്ന വിനോദ സഞ്ചാരികള്‍ക്കടക്കം റോഡിന്‍റെ സാഹചര്യം അറിയാത്തതിനാല്‍ വേഗതയില്‍ വാഹനമോടിക്കുന്നതും അപകടങ്ങള്‍ക്ക് കാരണമാകുന്നുണ്ട്.