ബെംഗളൂരു നഗരത്തില്‍ നോട്ടുമഴ; പത്ത് രൂപ നോട്ടുകൾ വാരിയെറിഞ്ഞ് അജ്ഞാതൻ

ബെംഗളൂരു കെആർ മാർക്കറ്റിലെ ഫ്ലൈ ഓവറിൽ നിന്നും പത്ത് രൂപ നോട്ടുകൾ മഴയായി പെയ്‌തിറങ്ങിയതോടെ ഒരു നിമിഷം അമ്പരപ്പിലായി യാത്രക്കാർ. ഇന്ന് രാവിലെയാണ് ജനങ്ങളെ അമ്പരപ്പിച്ചുകൊണ്ട് അജ്ഞാതനായ ഒരാൾ നോട്ടുകൾ എറിഞ്ഞത്. കറുത്ത കോട്ട് ധരിച്ചെത്തിയ ഇയാൾ പെട്ടെന്ന് തന്നെ ബാഗിലുണ്ടായിരുന്ന നോട്ടുകൾ വാരിവിതറുകയായിരുന്നു. 

മൂവായിരം രൂപ മുതൽ നാലായിരം രൂപ വരെയാണ് അജ്ഞാതർ എറിഞ്ഞുകൊടുത്തത്. ഇയാളെറിഞ്ഞ നോട്ടുകൾ പെറുക്കി എടുക്കാനായി ആളുകൾ ശ്രമിച്ചതോടെ നഗരത്തിൽ ഗതാഗതം സ്തംഭിച്ചു. നോട്ടുകൾ എറിയുന്നത് കണ്ട ചിലർ ഫ്ലൈ ഓവറിൽ കയറിയും നോട്ടുകൾ എടുത്തു.  

ബാഗിലെ പണം തീർന്നതോടെ അജ്ഞാതൻ സ്ഥലം വിടുകയായിരുന്നു. ആരാണ് പണം എറിഞ്ഞതെന്നും എന്തിനാണ് പണം എറിഞ്ഞതെന്നും വ്യക്തമായ വിവരം ലഭിച്ചിട്ടില്ല. അമ്പരപ്പോടെയാണെങ്കിലും പണം കിട്ടിയവർ സന്തോഷത്തോടെ യാത്രയായി