ഹൃദയ വൈകല്യമുള്ളവരില്‍ കൊവിഡ് എങ്ങനെയൊക്കെ ബാധിക്കും

ഹൃദയവൈകല്യമുള്ള വ്യക്തികളില്‍ കൊവിഡ് അതിതീവ്രമാകാന്‍ സാധ്യതയെന്ന് അമേരിക്കന്‍ ഗവേഷണസംഘത്തിന്‍റെ പഠനം

കൊവിഡ് 19 ബാധിച്ച് ആശുപത്രിയില്‍ പ്രവേശിപ്പിക്കുന്ന ഹൃദയസംബന്ധമായ രോഗങ്ങള്‍ ഉള്ളവരില്‍ മരണനിരക്ക് കൂടുതലെന്ന് യുഎസ് പഠനറിപ്പോര്‍ട്ട്.

ഹൃദയസംബന്ധമായ വൈകല്യങ്ങള്‍ ഉള്ള വ്യക്തികളെ കൊവിഡ്19 അതീവ ഗുരുതരമായി ബാധിക്കുമെന്നും പഠനറിപ്പോര്‍ട്ടില്‍ പറയുന്നു. അമേരിക്കയിലെ ജേണല്‍ സര്‍ക്കുലേഷനാണ് ഗവേഷണ റിപ്പോര്‍ട്ട് പുറത്തുവിട്ടത്. കൊവിഡ് 19 ബാധിക്കുന്ന ഇത്തരം ആരോഗ്യ പ്രശ്നങ്ങളുള്ള വ്യക്തികള്‍ക്ക് ഐസിയു, വെന്‍റിലേറ്റര്‍ എന്നിവയുടെ സഹായം ആവശ്യമായി വരുമെന്നും ഗവേഷകര്‍ പറഞ്ഞു. ഹൃദയ വൈകല്യമുള്ള വ്യക്തികള്‍ കൊവിഡ് 19 വാക്സിനുകള്‍ സ്വീകരിക്കാനും മാസ്ക് ധരിക്കുന്നതും ശാരീരിക അകലം പാലിക്കുന്നതും പോലെയുള്ള പ്രതിരോധ നടപടികൾ തുടരണമെന്നും ഗവേഷകര്‍ ആവശ്യപ്പെട്ടു. പഠനത്തില്‍ പരിമിധികള്‍ ഉണ്ടായിരുന്നുവെന്ന് ചൂണ്ടികാട്ടിയ ഗവേഷണസംഘം മേധാവി ഡൗണിങ്, കൊവിഡ് 19 ബാധിച്ച് ആശുപത്രിയിൽ പ്രവേശിപ്പിച്ച ഹൃദയ വൈകല്യങ്ങളുള്ള എല്ലാ രോഗികളിലും മോശം ഫലങ്ങൾ ഉണ്ടായിട്ടില്ലെന്നും വ്യക്തമാക്കി.

ഹൃദയവൈകല്യങ്ങള്‍ എന്ത്

ജനനത്തിനുമുമ്പ് ഹൃദയത്തിലോ ഹൃദയത്തിനടുത്തുള്ള രക്തക്കുഴലുകളിലോ സംഭവിക്കുന്ന ഘടനാവ്യത്യാസങ്ങളാണ് സാധാരണഗതിയിൽ ഹൃദയവൈകല്യങ്ങള്‍ ഉണ്ടാകാന്‍ കാരണം. അപകടകരമായ ഒരു ഡസനിലധികം തരത്തിലുള്ള ഹൃദയ വൈകല്യങ്ങളാണുള്ളത്. ഹൃദയ വൈകല്യങ്ങളുമായി ജനിക്കുന്നതിന്‍റെ കാരണം പലപ്പോഴും അവ്യക്തമാണ്‌. പത്തു ശതമാനത്തോളം പ്രശ്‌നങ്ങള്‍ക്കു മാത്രമേ കാരണം തിരിച്ചറിയാനാവൂ.

കൊവിഡ്19 ഗുരുതരമായി ബാധിക്കാന്‍ സാധ്യതയുള്ളവര്‍

ഹൃദയവൈകല്യമുള്ള വ്യക്തികള്‍ക്ക് പുറമേ 50 വയസിന് മുകളില്‍ പ്രായമുള്ള മറ്റ് ആരോഗ്യ പ്രശ്നങ്ങളുള്ളവരിലും രോഗത്തിന്‍റെ തീവ്രത കൂടുതലാകാന്‍ സാധ്യതയുണ്ടെന്നാണ് ഗവേഷകര്‍ പറയുന്നത്. കൂടുതലായും പുരുഷന്‍മാരിലാണ് രോഗാവസ്ഥ തീവ്രമായതെന്നാണ് കണ്ടെത്തല്‍.

ഗവേഷണത്തിന്‍റെ നാള്‍വഴികള്‍

2020 മാർച്ച് മുതൽ 2021 ജനുവരി വരെ ആശുപത്രിയിൽ പ്രവേശിപ്പിച്ച കൊവിഡ്-19 രോഗികളുടെ വിവരങ്ങളാണ് ഗവേഷകർ പരിശോധിച്ചത്. പ്രീമിയർ ഹെൽത്ത്‌കെയർ ഡാറ്റാബേസ് സ്‌പെഷ്യൽ കോവിഡ്-19 റിലീസിൽ ശേഖരിച്ച വിവരങ്ങളുടെ അടിസ്ഥാനത്തിലാണ് പഠനം നടന്നത്.യു.എസിലെ എല്ലാ ആശുപത്രികളിലെയും ഏകദേശം 20 ശതമാനത്തോളം വിവരങ്ങളും ഉള്‍പ്പെടുന്ന ഒരു ഡാറ്റാബേസാണ് പഠനത്തിനുപയോഗിച്ചത്. ഈ കാലയളവിൽ ലഭിച്ച വിവരങ്ങളില്‍ 1 മുതൽ 64 വയസ് വരെ പ്രായമുള്ള 235,000ത്തിലധികം രോഗികളാണ് ഉണ്ടായിരുന്നത്. ഈ രോഗികളെ ജന്മന ഹൃദയ വൈകല്യമുള്ളവരും അല്ലാത്തവരും എന്ന് രണ്ട് ഗ്രൂപ്പുകളായി തരം തിരിച്ചാണ് ഗവേഷകര്‍ നിരീക്ഷണം നടത്തിയത്. തുടര്‍ന്ന് ഇതില്‍ നിന്ന് ഐസിയുവിലേക്ക് എത്രപേർക്ക് പ്രവേശനം ആവശ്യമാണെന്നും ശ്വസിക്കാൻ സഹായിക്കുന്നതിന് വെന്റിലേറ്റർ ആവശ്യമായെന്നും രോഗം തീവ്രമായി മരിച്ചെന്നും ഗവേഷകർ കണ്ടെത്തി. രോഗികളുടെ ആരോഗ്യസ്ഥിതി ഉൾപ്പെടെയുള്ള മറ്റ് സവിശേഷതകളും വിദഗ്ദര്‍ പഠനത്തിന്‍റെ ഭാഗമായി അവലോകനം ചെയ്‌തു.