ഒരൊറ്റ സിനിമ കൊണ്ട് പാന്‍ ഇന്ത്യന്‍ സ്‌റ്റാറായി മാറിയിരിക്കുകയാണ് ഉണ്ണി മുകുന്ദന്‍. തിയേറ്ററില്‍ ഇപ്പോഴും വിജയക്കുതിപ്പ് തുടരുന്ന ചിത്രം 'മാര്‍ക്കോ' ആഗോളതലത്തില്‍ തന്നെ തരംഗം സൃഷ്‌ടിച്ച് മുന്നോട്ട് കുതിക്കുകയാണ്. ഭാഷഭേദമന്യേ ഏറ്റെടുത്ത ഈ ചിത്രം യുവാക്കള്‍ക്കിടയില്‍ ഇപ്പോള്‍ ട്രെന്‍ഡിങ് ആയി മാറി.
മാര്‍ക്കോയുടെ രണ്ടാം ഭാഗത്തെ കുറിച്ച് സോഷ്യല്‍ മീഡിയയില്‍ ചര്‍ച്ച തകൃതിയായി നടക്കുന്നുണ്ടെങ്കിലും ഔദ്യോഗികമായി അണിയറ പ്രവര്‍ത്തകര്‍ സ്ഥീരികരിച്ചിരുന്നില്ല. എന്നാല്‍ ചിത്രത്തിലെ നായകനായ ഉണ്ണി മുകുന്ദന്‍ തന്നെ സിനിമയ്ക്ക് രണ്ടാം ഭാഗം ഉണ്ടാകുമെന്ന് ഉറപ്പു നല്‍കുകയാണ്. ഒരു മാധ്യമത്തിന് നല്‍കിയ അഭിമുഖത്തിലാണ് സിനിമയുടെ രണ്ടാം ഭാഗത്തെ കുറിച്ച് ഉണ്ണിമുകുന്ദന്‍ തുറന്നു പറഞ്ഞത്.
സിനിമയുടെ രണ്ടാം ഭാഗം ഉണ്ടാകും, അതേസമയം താരനിരയെ കുറിച്ച് നടന്‍ വെളിപ്പെടുത്തിയിട്ടില്ല. ഹൈപ്പിന് മുകളില്‍ പോകുന്ന ഗംഭീര രണ്ടാം ഭാഗം ഒരുക്കാനാണ് തീരുമാനമെന്നും ഉണ്ണി പറഞ്ഞു. അതേസമയം തനിക്കും മാര്‍ക്കോയുടെ സംവിധായകന്‍ ഹനീഫ് അദേനിക്കും നിര്‍മാതാവ് മുഹമ്മദ് ഷെരീഫിനും സിനിമകള്‍ ചെയ്യാനുണ്ടെന്നും താരം പറഞ്ഞു.
മാര്‍ക്കോയുടെ രണ്ടാം ഭാഗത്തിനായി കൈകോര്‍ക്കാന്‍ ശ്രീ ഗോകുലം മൂവിസും എത്തുന്നുവെന്ന വാര്‍ത്തകള്‍ ഇതിനോടകം പ്രചരിച്ചിരുന്നു. മലയാളം കണ്ടതില്‍ വച്ച് ഏറ്റവും വലിയ ബഡ്‌ജറ്റില്‍ ഒരുങ്ങുന്ന ചിത്രമായിരിക്കും 'മാര്‍ക്കോ' എന്ന സൂചന നല്‍കികൊണ്ട് ശ്രീഗോകുലം മൂവിസ് വിക്രമിനൊപ്പമുള്ള ഫോട്ടോ പങ്കുവച്ചിരുന്നു. ഇതോടെ രണ്ടാം ഭാഗത്തില്‍ വിക്രം എത്തുമോയെന്നാണ് ആരാധകരുടെ സംശയം.
വിക്രമിനോടൊപ്പമുള്ള ചിത്രം 'മാര്‍ക്കോ'യുടെ നിര്‍മാതാവ് മുഹമ്മദ് ഷെരീഫ് നേരത്തെ പങ്കുവച്ചിരുന്നു. ഇതിന് പിന്നാലെയാണ് ഉണ്ണി മുകുന്ദനും ചിയാന്‍ വിക്രമും ശ്രീ ഗോകുലം മൂവിസിന്‍റെ എസ് ആര്‍ കൃഷ്‌ണ മൂര്‍ത്തിയും നില്‍ക്കുന്ന ഫോട്ടോ പുറത്തു വന്നത്.
ഷെരീഫ് പങ്കുവച്ച അതേ ചിത്രത്തിലെ പശ്ചാത്തലവും വിക്രമിന്‍റെ വേഷവും ഒന്നു തന്നെയാണ്. ഇതിലൂടെ വിക്രവുമായുള്ള കൂടിക്കാഴ്‌ചയില്‍ ഷെരീഫ് മുഹമ്മദിനൊപ്പം ധ്രുവ് വിക്രമും ഉണ്ണി മുകുന്ദനും എസ് ആര്‍ കൃഷ്‌ണമൂര്‍ത്തിയും ഉണ്ടായിരുന്നുവെന്ന് വ്യക്തമാക്കുന്ന ഫോട്ടോയാണിത്.
മാര്‍ക്കോ ഗംഭീര അഭിപ്രായവുമായി മുന്നോട്ടു പോകുകയാണ്. കഴിഞ്ഞ ദിവസം അല്ലു അര്‍ജുന്‍ വിളിച്ച് അഭിനന്ദിച്ചിരുന്നുവെന്നും സിനിമാ മേഖലയിലെ പല വലിയ സാങ്കേതിക പ്രവര്‍ത്തകരും വിളിച്ച് നല്ല അഭിപ്രായം പറയുന്നുണ്ടെന്നും ഉണ്ണി പറഞ്ഞു.
മാര്‍ക്കോ പാന്‍ ഇന്ത്യന്‍ ലെവലില്‍ ഹിറ്റായതോടെ തമിഴ്, തെലുഗു, ഹിന്ദി സിനിമകളില്‍ നിന്നെല്ലാം പുതിയ സിനിമകള്‍ക്കായി വിളിക്കുന്നുണ്ടെന്നും താരം പറഞ്ഞു. എന്നാല്‍ താന്‍ പെട്ടെന്ന് ഒന്നും ചെയ്യുന്നില്ല, ഒരു മലയാള സിനിമ ചെയ്‌തിട്ട് അത് ഇന്ത്യയാകെ നന്നായി കൊണ്ടുപോകാന്‍ കഴിഞ്ഞുവെന്നാണ് തന്‍റെ വലിയ സന്തോഷമെന്നും മറ്റു ഭാഷകളിലെ പ്രധാന മാധ്യമങ്ങളെല്ലാം തങ്ങളുടെ വര്‍ക്കിനെ വളരെ പോസറ്റീവായി പിന്തുണച്ചുവെന്നും ഉണ്ണി പറഞ്ഞു.
പാന്‍ ഇന്ത്യ എന്തെന്ന് തന്നെ പഠിപ്പിച്ചു തന്നെ സിനിമയാണ് മാര്‍ക്കോയെന്നും ഉണ്ണി പറഞ്ഞു. വയലന്‍സ് രംഗങ്ങള്‍ ഉള്ളത് കൊണ്ട് മാത്രമാണ് ഈ സിനിമ ചര്‍ച്ചയായതെന്ന് കരുതുന്നില്ല. സിനിമയുടെ ഓവറോള്‍ ടോട്ടാലിറ്റി നന്നായതുകൊണ്ടാണ് ചര്‍ച്ചയായതെന്നും ഉണ്ണി പറഞ്ഞു.
ക്യൂബ്‌സ് എന്റർടെയ്ൻമെന്‍റ്സ്, ഉണ്ണി മുകുന്ദന്‍ ഫിലിംസ് എന്നീ ബാനറുകളില്‍ ഷെരീഫ് മുഹമ്മദ് ആണ് 'മാര്‍ക്കോ' നിര്‍മ്മിച്ചത്.
ഉണ്ണി മുകുന്ദനോടൊപ്പം സിദ്ദിഖ്, ജഗദീഷ്, ആൻസൺ പോൾ, കബീർ ദുഹാൻസിങ് , അഭിമന്യു തിലകൻ, യുക്തി തരേജ തുടങ്ങിയവരും ഒട്ടേറെ പുതുമുഖ താരങ്ങളും അണിനിരക്കുന്ന ഈ ചിത്രത്തിലെ നായിക കഥാപാത്രവും മറ്റ് സുപ്രധാന വേഷങ്ങളും ബോളിവുഡ് താരങ്ങളാണ് അവതരിപ്പിച്ചത്.
