വാഷിംഗ്‌ടൺ: മനുഷ്യനിൽ അഞ്ച് മണിക്കൂറിൽ താഴെ ഉറങ്ങുന്ന 50 വയസുമുതൽ ഉള്ളവരിൽ വിട്ടുമാറാത്ത അസുഖങ്ങൾ(chronic illnesses) ഉണ്ടാകാനുള്ള സാധ്യതയുള്ളതായി പഠനങ്ങൾ. 50, 60, 70 വയസുള്ള 7,000-ത്തിലധികം പുരുഷന്മാരുടെയും സ്‌ത്രീകളുടെയും ആരോഗ്യത്തിൽ ഉറക്കത്തിന്‍റെ ദൈർഘ്യം വിശകലനം ചെയ്‌തതിന്‍റെ അടിസ്ഥാനത്തിലാണ് റിപ്പോർട്ടുകൾ. ഇവരിൽ ഓരോരുത്തരും 25 വർഷത്തിനിടയിൽ എത്ര നേരം ഉറങ്ങുന്നു എന്നും അതേസമയം ഇവരിൽ ഹൃദ്രോഗം, കാൻസർ, പ്രമേഹം എന്നിങ്ങനെയുള്ള അസുഖങ്ങൾ എത്രത്തോളം കാണപ്പെടുന്നു എന്നും താരതമ്യം ചെയ്യപ്പെട്ടു.
അതിൽ 50 വയസിൽ അഞ്ച് മണിക്കൂറോ അതിൽ താഴെയോ ഉറക്കം ലഭിക്കുന്നതായി റിപ്പോർട്ട് ചെയ്‌ത ആളുകൾക്ക് വിട്ടുമാറാത്ത രോഗമുണ്ടാകാനുള്ള സാധ്യത ഏഴുമണിക്കൂർ ഉറങ്ങുന്നവരെ അപേക്ഷിച്ച് 20 ശതമാനം കൂടുതലാണ്. 50 വയസിൽ കൂടുതൽ ഉള്ളവരിൽ മൾട്ടിമോർബിഡിറ്റി(രണ്ടോ അതിലധികമോ വിട്ടുമാറാത്ത രോഗങ്ങൾ ഉള്ള അവസ്ഥ) സാധ്യത 30 മുതൽ 40 ശതമാനം വരെ വർധിക്കും. മാത്രമല്ല 25 ശതമാനം മരണനിരക്ക് വർധിക്കാനും സാധ്യതയുള്ളതായി ഗവേഷകർ പറയുന്നു.
ഉയർന്ന വരുമാനമുള്ള രാജ്യങ്ങളിൽ മൾട്ടിമോർബിഡിറ്റി വർധിച്ചുകൊണ്ടിരിക്കുകയാണ്. പ്രായമായവരിൽ പകുതിയിലധികം പേർക്കും വിട്ടുമാറാത്ത അസുഖങ്ങൾ ഉണ്ട്. വ്യക്തികൾക്ക് പ്രായമാകുംതോറും ഉറക്കത്തിന്‍റെ ഘടനയും ശീലവും മാറുന്നതിനാൽ ഇത് പൊതുസമൂഹത്തിന് ഒരു വെല്ലുവിളിയാകുന്നു.
ഉറങ്ങുന്നതിന് മുമ്പ് കിടപ്പുമുറി ശാന്തവും ഇരുണ്ടതും സുഖപ്രദമായ താപനിലയിലുമാണെന്ന് ഉറപ്പാക്കുന്നത് പോലെ നല്ല ഉറക്കവും പ്രോത്സാഹിപ്പിക്കേണ്ടത് പ്രധാനമാണ്. അതുപോലെ ഒൻപത് മണിക്കൂറോ അതിൽ കൂടുതലോ നീണ്ടുനിൽക്കുന്ന ഉറക്കം ആരോഗ്യപ്രശ്‌നങ്ങൾക്ക് കാരണമാകുമോ എന്നും പഠനങ്ങൾ നടന്നുവരുന്നു. എന്നാൽ ഇത്തരത്തിലുള്ള പ്രശ്‌നങ്ങളിൽ ആയുർവേദ ചികിത്സയ്‌ക്ക് കാര്യമായ മാറ്റങ്ങൾ രോഗികളിൽ കൊണ്ടുവരാൻ കഴിയുമെന്ന് ആയുഷ് മന്ത്രാലയം അറിയിച്ചു.
അശ്വഗന്ധ തൈലത്തോടുകൂടിയ ശിരോധാര ഉറക്കക്കുറവിന് നല്ലൊരു പ്രതിവിധിയാണെന്നും പഠനങ്ങൾ പറയുന്നു.
