നിത്യ ജീവിതത്തില്‍ ആരോഗ്യത്തോടെയിരിക്കാന്‍ അത്യാന്താപേക്ഷിതമാണ് ശരിയായ ഉറക്കം. എന്നാല്‍ തിരക്കേറിയ ജീവിതത്തിനിടയില്‍ കൃത്യ സമയത്ത് ഉറങ്ങാനും ഉണരാനും മിക്കവര്‍ക്കും സാധിക്കാതെ വരുന്നു. ഇത്തരത്തില്‍ ഉറക്കത്തിലെ അപാകതകളാണ് നിരവധി പേരെ ദീര്‍ഘകാല രോഗികളാക്കി മാറ്റുന്നത്.
മാനസിക സമര്‍ദങ്ങള്‍ കൊണ്ട് ഉറങ്ങാന്‍ കഴിയാത്തവരായിട്ടും നിരവധി പേരുണ്ട് നമ്മുക്ക് ചുറ്റും. മാനസികവും, ശാരീരികവുമായ എല്ലാ അസ്വസ്ഥകളും മാറ്റി സുഗമമായ ഉറക്കം ലഭിക്കാനും അതിലൂടെ മെച്ചപ്പെട്ട ആരോഗ്യം സ്വയത്തമാക്കുന്നതിനും നമ്മള്‍ പതിവാക്കേണ്ട കാര്യങ്ങളാണ് താഴെ കൊടുത്തിരിക്കുന്നത്.
ഭക്ഷണ രീതി: നിങ്ങള്‍ ഉറങ്ങാന്‍ പോകുന്നതിന് 2അല്ലെങ്കില്‍ 3 മണിക്കൂര്‍ മുന്‍പ് ഭക്ഷണം കഴിക്കുന്നത് പതിവാക്കുക. നമ്മള്‍ കഴിയ്ക്കുന്ന ഭക്ഷണം ദഹിക്കാന്‍ ഏകദേശം 3,4 മണിക്കൂറെങ്കിലും വേണം. ഇത്തരത്തില്‍ നേരത്തെ ഭക്ഷണം കഴിക്കുന്നത് ദഹന പ്രക്രിയ സുഖമാക്കുന്നു. അതുപോലെ വൈകി ഉറങ്ങുന്നതും ഭക്ഷണം കഴിച്ചയുടനെ ഉറങ്ങുന്നതുമായ ശീലങ്ങള്‍ പൂര്‍ണമായും ഒഴിവാക്കുക കാരണം അത് ശരീരത്തെ പ്രതികൂലമായി ബാധിക്കും. വൈകി ഉറങ്ങുന്നവര്‍ക്ക് രാത്രിയില്‍ ഉറക്കം തികയാതെ വരുന്നു ഇത് അടുത്ത ദിവസത്തെ നിങ്ങളുടെ പ്രവര്‍ത്തികളെ പ്രതികൂലമായ ബാധിക്കും.
കുളിക്കുന്ന രീതി: കിടക്കാന്‍ പോകുന്നതിന് തൊട്ട് മുമ്പ് കുളിക്കുന്നത് പതിവാക്കിയാല്‍ അത് നിങ്ങളുടെ ശരീരത്തില്‍ നിരവധി മാറ്റങ്ങളുണ്ടാക്കുന്നു. ഇത്തരത്തില്‍ കുളിക്കുമ്പോള്‍ അത് ശരീരത്തിലെ താപനില കുറക്കുകയും അത് സുഗമമായ ഉറക്കം ലഭിക്കുന്നതിനും കാരണമാകുന്നു. ഇങ്ങനെ കുളിക്കുമ്പോള്‍ അത് നമ്മുടെ മാനസിക സമര്‍ദം, ഉത്കണ്ഠ തുടങ്ങിയിട്ടുള്ള മുഴുവന്‍ മാനസിക പ്രശനങ്ങളെയും കുറക്കുന്നു.
ധ്യാനം/പ്രാര്‍ഥന ശീലിക്കുക: നിങ്ങള്‍ കിടക്കാന്‍ പോകുന്നതിന്‍റെ തൊട്ട് മുമ്പായി പത്തോ, പതിനഞ്ചോ മിനിറ്റ് ധ്യാനിക്കുന്നതോ പ്രാര്‍ഥിക്കുന്നതോ നല്ലതാണ്. ഇത്തരത്തിലുള്ള ധ്യാനം/പ്രാര്‍ഥന നിങ്ങളുടെ ശരീരത്തിനകത്തും പുറത്തും മാറ്റങ്ങള്‍ വരുത്തുന്നു. ധ്യാനത്തിന് ശേഷം കിടക്കുന്നത് സുഗമമായ ഉറക്കം ലഭിക്കുന്നതിന് കാരണമാകുന്നു.
താപനില: നിങ്ങള്‍ ഉറങ്ങാന്‍ പോകുമ്പോഴുള്ള നിങ്ങളുടെ ശരീര താപനില നിങ്ങളുടെ ഉറക്കത്തെ കാര്യമായി ബാധിക്കുന്നു. ശരീര താപനില കുറവാണെങ്കില്‍ നിങ്ങള്‍ നന്നായി ഉറങ്ങാന്‍ കഴിയും എന്നാല്‍ ഉയര്‍ന്ന താപനിലയില്‍ നിങ്ങള്‍ക്ക് ഉറക്കം ശരിയായ രീതിയില്‍ ലഭിക്കില്ല. എന്നാല്‍ ഏറ്റവും കുറഞ്ഞ താപനിലയാണെങ്കില്‍ നന്നായി ഉറക്കം ലഭിക്കുന്നു.അതു കാരണം അടുത്ത ദിവസം കൂടുതല്‍ ഉന്മേഷവനാകാനും നിങ്ങള്‍ക്ക് സാധിക്കും.
ഇരുട്ട്: ഉറക്കത്തിന്‍റെ കാര്യത്തില്‍ വെളിച്ചത്തിന് വലിയൊരു പങ്കുണ്ട്. ഉറങ്ങുന്നതിന്‍റെ ഒരു മണിക്കൂര്‍ മുന്‍പ് തന്നെ നിങ്ങളുടെ മൊബൈല്‍ ഫോണ്‍ ഓഫാക്കി വെക്കാന്‍ ശ്രദ്ധിക്കുക. മൊബൈല്‍ മാത്രമല്ല വെളിച്ചം നല്‍കുന്ന ലൈറ്റുകള്‍, ടിവി, ലാപ്ടോപ്പ് എന്നിവയുടെ ഉപയോഗം നിര്‍ത്തിവെക്കുകയും നമ്മള്‍ ഉപയോഗിക്കുന്ന ഇലക്ടോണിക് ഉപകരണങ്ങളെല്ലാം യഥാസ്ഥലത്ത് തന്നെയാണോയെന്നും ഉറപ്പ് വരുത്തുക.
വായന: ഉറങ്ങാന്‍ കിടക്കുന്നതിന് കുറച്ച് മുമ്പായി അല്പം വായിക്കുന്നത് തലച്ചോറിന് ആയാസം നല്‍കുന്നു. അത് കൊണ്ട് അത്തരം പ്രവര്‍ത്തികള്‍ നമ്മള്‍ക്ക് നല്ല ഉറക്കം ലഭ്യമാക്കുന്നു.
ഉറങ്ങുന്ന സമയം: എല്ലാ ദിവസവും ഉറങ്ങുന്നത് ഒരു സമയമാക്കി ക്രമീകരിക്കുക. സമയ ക്രമീകരണം കൂടുതല്‍ ചിട്ടയായ ജീവിതം നയിക്കുന്നതിന് കാരണമാകുന്നു.
