ലണ്ടൻ: കൊവിഡ് ബാധിച്ച ശേഷം രണ്ട് വർഷം കഴിഞ്ഞ് മുതിർന്ന ആളുകളിൽ ഡിമെൻഷ്യ (മറവിരോഗം, മേധക്ഷയം), അപസ്‌മാരം തുടങ്ങി നാഡീസംബന്ധവും മാനസികവുമായ രോഗങ്ങൾക്ക് സാധ്യത കൂടുതലാണെന്ന് പഠനം. കൊവിഡ് അതിജീവിച്ച മുതിർന്നവർക്ക് കുട്ടികളെ അപേക്ഷിച്ച് നാഡീസംബന്ധവും മാനസികവുമായ അസുഖങ്ങൾ ഉണ്ടാകാനുള്ള സാധ്യതയും അതിന്‍റെ അപകട സാധ്യതയും കൂടുതലാണെന്നും പഠനത്തിന് നേതൃത്വം നല്‍കിയ യുകെയിലെ ഓക്സ്‌ഫോഡ് സർവകലാശാലയിലെ പ്രൊഫസർ പോൾ ഹാരിസൺ പറഞ്ഞു.
അതേ സമയം ഈ വർദ്ധിച്ച അപകടസാധ്യതകളിൽ ചിലത്, കുറഞ്ഞത് രണ്ട് വർഷമെങ്കിലും നീണ്ടുനിൽക്കുമെന്ന് ഈ പഠനം സൂചിപ്പിക്കുന്നു. കൊവിഡിന് ശേഷം ഇത്തരം ആരോഗ്യ പ്രശ്‌നങ്ങൾ സംഭവിക്കുന്നത് എന്തുകൊണ്ടാണെന്നും ഈ അവസ്ഥകളെ തടയുന്നതിനോ ചികിത്സിക്കുന്നതിനോ എന്തുചെയ്യാനാകുമെന്നും മനസിലാക്കാൻ കൂടുതൽ ഗവേഷണത്തിന്‍റെ ആവശ്യകത ഉണ്ടെന്നും പഠനം സൂചിപ്പിക്കുന്നുണ്ട്.
ഇത്തരം രോഗങ്ങളുടെ അപകടസാധ്യത കണ്ടെത്താൻ കൊവിഡ് മഹാമാരിയുടെ വ്യത്യസ്‌ത തരംഗങ്ങളിൽ രോഗനിർണയം നടത്തിയവരുടെ റെക്കോഡുകൾ താരതമ്യം ചെയ്യുകയാണ് ചെയ്യുന്നത്. ഇതിൽ മുതിർന്നവരിൽ, SARS-CoV-2 അണുബാധയ്ക്ക് ശേഷം വിഷാദരോഗം ഉണ്ടാകാനുള്ള സാധ്യത തുടക്കത്തിൽ കൂടുകയും പിന്നീട് സാധാരണ അവസ്ഥയിലേക്ക് വരുന്നതായും കണ്ടെത്തി.
രണ്ട് വർഷം മുമ്പ് കൊവിഡ് ബാധിച്ച 18-64 വയസ് പ്രായമുള്ള മുതിർന്നവർക്ക്, ഇതേ കാലയളവില്‍ മറ്റ് ശ്വാസകോശ സംബന്ധമായ അണുബാധകൾ ഉള്ളവരുമായി താരതമ്യപ്പെടുത്തുമ്പോൾ, കൊഗ്‌നിറ്റീവ് ഡെഫിസിറ്റ് അല്ലെങ്കിൽ 'മസ്‌തിഷ്‌ക മൂടൽമഞ്ഞ്', പേശി രോഗങ്ങൾ എന്നിവ ഉണ്ടാകാനുള്ള സാധ്യത കൂടുതലാണ്. കുട്ടികളിൽ ഇത്തരം അസുഖങ്ങളും അപകട സാധ്യതയും കുറവാണെന്നും പഠനം പറയുന്നു.
