പാരമ്പര്യ അന്ധത ബാധിച്ച മുതിര്‍ന്നവർക്ക് ഭാഗികമായി കാഴ്‌ചശക്തി വീണ്ടെടുക്കാന്‍ സാധിക്കുമെന്ന് പഠനം. യൂണിവേഴ്‌സിറ്റി ഓഫ് കാലിഫോർണിയ ഇർവിനിലെ സ്‌കൂള്‍ ഓഫ് ബയോളജിക്കൽ സയൻസസ് ആന്‍ഡ് സ്‌കൂള്‍ ഓഫ് മെഡിസിന്‍ എന്നിവിടങ്ങളില്‍ നിന്നുള്ള ഗവേഷക സംഘം സംയുക്തമായി നടത്തിയ പഠനത്തിലാണ് പുതിയ കണ്ടെത്തല്‍. പാരമ്പര്യമായി ചെറുപ്രായത്തില്‍ തന്നെ കാഴ്‌ചശ്ക്തി നഷ്‌ടപ്പെടുന്ന രോഗാവസ്ഥയായ ലെബർ കൺജെനിറ്റൽ അമ്യൂറോസിസുമായി (എൽസിഎ) ബന്ധപ്പെട്ട ചികിത്സയാണ് ഗവേഷണ സംഘം പഠനത്തിന്‍റെ ഭാഗമായി പരിശോധിച്ചത്.
സിന്തറ്റിക് റെറ്റിനോയിഡുകൾ എന്ന് വിളിക്കപ്പെടുന്ന രാസസംയുക്തങ്ങള്‍ റെറ്റിനയിലേക്ക് നേരിട്ട് നല്‍കിയാല്‍ എൽസിഎ ബാധിതരായ കുട്ടികളില്‍ ഭാഗികമായി കാഴ്‌ചശക്തി പുനഃസ്ഥാപിക്കാന്‍ സാധിക്കും. ഇതേ രോഗാവസ്ഥയുള്ള മുതിര്‍ന്നവരിലും ഈ ചികിത്സ സമാന ഫലമുണ്ടാക്കുമോയെന്ന് കണ്ടെത്തലായിരുന്നു ഗവേഷക സംഘത്തിന്‍റെ ലക്ഷ്യം. നാഷണൽ ഇൻസ്റ്റിറ്റ്യൂട്ട് ഓഫ് ഹെൽത്ത്, ഡിപ്പാർട്ട്‌മെന്‍റ് ഓഫ് വെറ്ററൻസ് അഫയേഴ്‌സ്, റിസർച്ച് ടു പ്രിവന്‍റ് ബ്ലൈൻഡ്‌നെസ് ഫൗണ്ടേഷൻ എന്നിവ ചേര്‍ന്നാണ് ഗവേഷണത്തിന് ധനസഹായം നൽകിയത്.
തലച്ചോറിന് മുന്നറിയിപ്പ് നല്‍കുന്ന സര്‍ക്യൂട്ട്: പ്രസ്‌തുത ചികിത്സ കാഴ്‌ചയുമായി ബന്ധപ്പെട്ട മസ്‌തിഷ്‌ക സര്‍ക്യൂട്ടുകളെ മികച്ച രീതിയിലാണ് സ്വാധീനിച്ചതെന്ന് ഗവേഷക സംഘത്തിലെ അംഗവും ന്യൂറോബയോളജി ആൻഡ് ബിഹേവിയർ ഡിപ്പാര്‍ട്ട്മെന്‍റിലെ പ്രൊഫസറുമായ സുനിൽ ഗാന്ധി അഭിപ്രായപ്പെട്ടു. കാഴ്‌ചശക്തിയുടെ കാര്യത്തില്‍ റെറ്റിനയേക്കാള്‍ നിര്‍ണായകം മസ്‌തിഷ്‌ക സര്‍ക്യൂട്ടുകളാണ്.
കണ്ണുകളില്‍ നിന്ന് ആരംഭിക്കുന്ന ഇത്തരം സര്‍ക്യൂട്ടുകള്‍ തലച്ചോറിലുടനീളം സിഗ്നലുകള്‍ കൈമാറും. തലച്ചോറിന്‍റെ കേന്ദ്രഭാഗത്താണ് കാഴ്‌ച വേദനം (Visual Perception) ഉണ്ടാകുന്നത്. സെന്‍ട്രല്‍ സര്‍ക്യൂട്ടുകള്‍ക്ക് കൃത്യമായി പ്രവര്‍ത്തിക്കാന്‍ ഈ സിഗ്നലുകള്‍ കുട്ടിക്കാലത്ത് തന്നെ ലഭിക്കണമെന്നായിരുന്നു ഗവേഷകര്‍ ഇതുവരെ കരുതിയിരുന്നതെന്നും സുനിൽ ഗാന്ധി വ്യക്തമാക്കി.
സജീവമായ ന്യൂറോണുകള്‍: കാഴ്‌ചശക്തിയെ പൂര്‍ണമായി കവര്‍ന്നെടുക്കുന്ന എൽസിഎ റോഡന്‍റ് മാതൃകകളില്‍ ചികിത്സ നടത്തിയപ്പോള്‍ മുതിർന്നവരിൽ സെൻട്രൽ വിഷ്വൽ പാത്ത്‌വേ സിഗ്നലിങ് ഗണ്യമായി പുനഃസ്ഥാപിക്കാനായതായി ഗവേഷകര്‍ കണ്ടെത്തി.
ചികിത്സയ്‌ക്ക് ശേഷം, എതിര്‍ ദിശ നേത്രപാതയില്‍ (Opposite-side Eye) നിന്ന് തലച്ചോറിലേക്ക് എത്തുന്ന സിഗ്നലുകള്‍ തലച്ചോറില്‍ രണ്ട് മടങ്ങ് കൂടുതൽ ന്യൂറോണുകളെ ആക്റ്റിവേറ്റ് ചെയ്‌തു. ഒരേ ദിശ നേത്രപാതയില്‍ (Same-side Eye) നിന്നും എത്തുന്ന സിഗ്നലുകള്‍ അഞ്ച് മടങ്ങ് കൂടുതല്‍ ന്യൂറോണുകളെ സജീവമാക്കിയെന്നും ഗവേഷകര്‍ കണ്ടെത്തി.
ഗവേഷണ സാധ്യത: പ്രതീക്ഷിച്ചിരുന്നതിലും മികച്ച ഫലമാണ് ഗവേഷണത്തില്‍ നിന്ന് ലഭിച്ചതെന്ന് സംഘം വ്യക്തമാക്കി. മുതിര്‍ന്നവരില്‍ വിജയകരമായ ഈ ചികിത്സ രീതി ഗവേഷണ സാധ്യതകള്‍ തുറന്നിടുന്നു. കാഴ്‌ച വൈകല്യം നേരിടുന്നവരിലെ പ്രശ്‌നങ്ങള്‍ പരിഹരിക്കുന്ന റെറ്റിനോയിഡ് തെറാപ്പി പോലുള്ള ചികിത്സ രീതികള്‍ വിപുലീകരിക്കുന്നതിന് പഠനം ഉപകാരപ്പെടുമെന്നും ഗവേഷകര്‍ അഭിപ്രായപ്പെട്ടു.
