തൃശൂർ: പാലക്കാട് നിന്നും കാണാതായ പ്ലസ് ടു വിദ്യാർഥിയെ തൃശൂരിൽ മരിച്ച നിലയിൽ കണ്ടെത്തി. പാലക്കാട് പെഴുങ്കര അറഫ നഗറിൽ മുസ്‌തഫയുടെ മകൻ 17 വയസുള്ള മുഹമ്മദ് അനസാണ് മരിച്ചത്. വിദ്യാർഥി കെട്ടിടത്തിൽ നിന്നും ചാടി മരിക്കുകയായിരുന്നുവെന്നാണ് പ്രാഥമിക നിഗമനം.
പ്ലസ് ടു വിദ്യാർഥിയായ അനസിനെ കഴിഞ്ഞ തിങ്കളാഴ്‌ച മുതലാണ് പാലക്കാട്ടെ വീട്ടില്‍ നിന്നും കാണാതായത്. തുടര്‍ന്ന് ചൊവ്വാഴ്‌ച രാവിലെ ചാവക്കാട് എടക്കഴിയൂർ അഫയൻസ് ബീച്ചിൽ വിദ്യാർഥിയെ കണ്ടതായി വിവരം ലഭിച്ചിരുന്നു. പിന്നീട് ഇവിടെ നിന്നും പോയ അനസിനെക്കുറിച്ച് വിവരമൊന്നും ലഭിച്ചിരുന്നില്ല.
തുടർന്ന് മേഖലയിൽ അന്വേഷണം നടത്തി വരുന്നതിനിടയിലാണ് ചൊവ്വാഴ്‌ച ഉച്ചക്ക് ഒരു മണിയോടെ തൃശൂര്‍ നഗരത്തിലെ കൊക്കാലെയിലെ ഏഴ് നില കെട്ടിടത്തില്‍ നിന്നും വീണ് മരിച്ച നിലയില്‍ കണ്ടെത്തിയത്. മരിച്ചത് ആരാണെന്ന് അന്ന് തിരിച്ചറിഞ്ഞിരുന്നില്ല. തുടര്‍ന്ന് തൃശൂര്‍ ഈസ്റ്റ് പൊലീസ് മറ്റു നടപടികള്‍ പൂര്‍ത്തിയാക്കി മൃതദേഹം തൃശൂര്‍ ജനറല്‍ ആശുപത്രി മോര്‍ച്ചറിയിലേക്ക് മാറ്റിയിരുന്നു.
തുടര്‍ന്ന് വിവരം അറിഞ്ഞ് ബന്ധുക്കള്‍ തൃശൂരിലെത്തി മൃതദേഹം തിരിച്ചറിയുകയാണുണ്ടായത്. അതേസമയം അനസ് വീട് വിട്ടിറങ്ങാനുള്ള കാരണം ഇനിയും വ്യക്തല്ല.
