തൃശൂർ : കോണ്ഗ്രസിനെതിരെ ജില്ലയിലെ കേരളകോണ്ഗ്രസ് വിഭാഗം രംഗത്ത്. ഇരിങ്ങാലക്കുടയിലെ സീറ്റ് കോൺഗ്രസ് ഏറ്റെടുക്കണം എന്ന് പാർട്ടിയുടെ പ്രാദേശിക നേതൃത്വം കഴിഞ്ഞ ദിവസം ആവശ്യപ്പെട്ടിരുന്നു. എന്നാൽ കേരളാ കോൺഗ്രസ് എം നേതാവ് തോമസ് ഉണ്യാടന് ഉൾപ്പടെയുള്ളവർ പ്രതിഷേധവുമായി രംഗത്ത് എത്തി. തങ്ങൾക്ക് വിജയം ഉറപ്പുള്ള മണ്ഡലത്തിൽ ഒരു കൈമാറ്റത്തിന്റെ ആവശ്യമില്ല എന്നാണ് അവരുടെ നിലപാട്. ഇതിന് പിന്നാലെയാണ് കേരളാ കോണ്ഗ്രസിന്റെ ജില്ലാ നേതൃയോഗത്തിലും വിഷയം ചർച്ചയായത്.
സംസ്ഥാന തലത്തിൽ പാർട്ടിയുടെ സീറ്റുകൾ പിടിച്ചെടുക്കാൻ ശ്രമിക്കുകയും പാർട്ടിയുടെ ചില നിയോജകമണ്ഡലങ്ങളിൽ പ്രമേയം പാസാക്കുകയും ചെയ്ത കോൺഗ്രസ് നേതൃത്വത്തിന്റെ നീക്കം മുന്നണി മര്യാദയുടെ ലംഘനമാണെന്ന് ഇവർ കുറ്റപ്പെടുത്തി. യുഡിഎഫിന്റെ വിജയത്തെ ഇത് ബാധിക്കുമെന്നും കേരളാ കോൺഗ്രസ് ജില്ലാ നേതൃത്വം മുന്നറിയിപ്പ് നൽകി. സംഭവത്തിൽ ശക്തമായ പ്രതിഷേധത്തിനാണ് കേരളാ കോൺഗ്രസ് തയ്യാറെടുക്കുന്നത്. എന്നാൽ കോൺഗ്രസിന്റെ മുതിർന്ന നേതാക്കൾ വിഷയത്തിൽ പ്രതികരിക്കാൻ തയ്യാറായിട്ടില്ല.