ഗുരുവായൂർ ക്ഷേത്രത്തിൽ ഇല്ലം നിറ നടന്നു

പുതുതായി കൊയ്‌തെടുത്ത കതിര്‍ക്കറ്റകള്‍ ക്ഷേത്രത്തിലെത്തിച്ച് പൂജ ചെയ്ത് ശ്രീലകത്ത് കതിരുകള്‍ നിറയ്ക്കുന്നതാണ് ഇല്ലം നിറ

തൃശ്ശൂർ: ഗുരുവായൂർ ക്ഷേത്രത്തിൽ ഇല്ലം നിറക്ക് സാക്ഷിയായി ആയിരക്കണക്കിന് വിശ്വാസികൾ. വീട്ടിൽ ഐശ്വര്യം നിറയാനും കാർഷിക അഭിവൃദ്ധിക്കുമായുള്ള വിശേഷ ചടങ്ങായ ഇല്ലം നിറ രാവിലെ ഒമ്പതോടെ നടന്നു. 9.10 മുതൽ 9.40 വരെയുള്ള മുഹൂർത്തത്തിലായിരുന്നു പ്രധാന ചടങ്ങുകൾ.

ഗുരുവായൂർ ക്ഷേത്രത്തിൽ ഇല്ലം നിറ നടന്നു

അവകാശികളായ മനയത്ത് അഴിക്കൽ കുടുംബാംഗങ്ങൾ, നിലത്ത് അരിമാവ് അണിഞ്ഞ് ഇലകൾ നിരത്തി വച്ച് നെൽക്കതിർ കറ്റകൾ കിഴക്കേ ഗോപുരനടയിൽ സമർപ്പിച്ചു. കീഴ്ശാന്തി കതിരുകളിൽ തീർഥം തെളിച്ച് ശംഖു വിളിയോടെ നിറയോ നിറയെന്ന് വിളിച്ചു ചൊല്ലി. അറുപതോളം കീഴ്ശാന്തിക്കാർ കതിർകറ്റകൾ ശിരസിലേന്തി ക്ഷേത്ര പ്രദക്ഷിണം ചെയ്ത് നാലമ്പലത്തിലെ നമസ്കാര മണ്ഡപത്തിൽ സമർപ്പിച്ചു. മേൽശാന്തി പൊട്ടക്കുഴി കൃഷ്ണൻ നമ്പൂതിരി കതിർ പൂജിച്ച് ഒരു കെട്ട് കതിർ ഗുരുവായൂരപ്പന് സമർപ്പിച്ചു. തുടർന്ന് പട്ട് അണിയിച്ച് ശ്രീലകത്ത് സ്ഥാപിച്ചു. ക്ഷേത്രത്തിലെ ഉപദേവ ശ്രീകോവിലുകളിലും ഇല്ലം നിറ നടന്നു.

ഗുരുവായൂർ സമീപ ക്ഷേത്രങ്ങളായ മമ്മിയൂർ മഹാദേവക്ഷേത്രത്തിലും തിരുവെങ്കിടം ക്ഷേത്രത്തിലും ഇല്ലം നിറ നടന്നു. ബുധനാഴ്ച പുത്തരി പായസമുണ്ടാക്കി സമർപ്പിക്കും.