തൃശൂര്‍: ലാലൂരിലെ കായിക സമുച്ചയ നിർമാണം വൈകുന്നതിന് കാരണം കോർപറേഷന്റെ കഴിവുകേടാണെന്ന് വിമര്‍ശിച്ച മന്ത്രി ഇ.പി ജയരാജനെ തള്ളി മന്ത്രി സുനിൽകുമാറും കോർപറേഷൻ ഇടതു ഭരണസമിതിയും. ലാലൂരിൽ നിർമാണം പുരോഗമിക്കുന്ന കായിക സമുച്ചയത്തിന്റെ നിര്‍മാണ പ്രവൃത്തികൾ വിലയിരുത്തിയ ശേഷം മാധ്യമങ്ങളോട് പ്രതികരിച്ച മന്ത്രി വി.എസ്. സുനിൽകുമാർ ഇതിനേക്കാൾ വേഗത്തിൽ നിർമാണം നടത്താൻ കഴിയില്ലെന്ന് തുറന്നടിച്ചു. തൃശൂര്‍ കോർപറേഷൻ ഉടമസ്ഥതയിലുള്ള വി.കെ.എൻ മേനോൻ ഇൻഡോർ സ്റ്റേഡിയത്തിൽ കഴിഞ്ഞ ദിവസം നടന്ന ആധുനിക ജിംനേഷ്യത്തിന്‍റെ ഉദ്‌ഘാടന പ്രസംഗത്തിനിടയിലായിരുന്നു കോർപറേഷനെതിരെ ഇ.പി ജയരാജന്‍റെ വിമർശനം.
116 കോടിയുടെ പദ്ധതിയുടെ ആദ്യ ഘട്ടമായി 44 കോടിയുടെ പ്രവൃത്തികൾ പുരോഗമിക്കുകയാണ്. രണ്ടാം ഘട്ടത്തിലെ 70 കോടിയുടെ പ്രവൃത്തികൾക്കും അംഗീകാരമായി. ഈ സർക്കാരിന്റെ കാലത്ത് തന്നെ കായിക സമുച്ചയം കമ്മീഷൻ ചെയ്യാനാണ് ആലോചിക്കുന്നത്. ആറ് മാസം കൊണ്ട് അതിവേഗത്തിലാണ് നിർമാണം നടക്കുന്നത്. കായിക മന്ത്രി ലാലൂരിനെ ഉദ്ദേശിച്ചാവില്ല പറഞ്ഞതെന്നും ഇക്കാര്യത്തിൽ മന്ത്രിയുമായി സംസാരിച്ചിട്ടില്ലെന്നും സുനിൽകുമാർ പറഞ്ഞു. മുഖ്യമന്ത്രിയാണ് പ്രവർത്തികൾ വിലയിരുത്തുന്നതെന്നും മന്ത്രി കൂട്ടിച്ചേര്‍ത്തു. അന്താരാഷ്ട്ര നിലവാരത്തിലുള്ള നീന്തല്‍ കുളം, സ്റ്റേഡിയം, കായിക താരങ്ങൾക്ക് താമസിക്കാനുള്ള മുറികള്‍ തുടങ്ങിയ സൗകര്യങ്ങളുള്ള സമുച്ചയമാണ് ലാലൂരില്‍ നിര്‍മിക്കുന്നത്.
കായിക സമുച്ചയത്തിന്റെ നിര്‍മാണത്തിന് തടസമായി നിൽക്കുന്ന കെട്ടിടം നീക്കുന്നതിന് നടപടികൾ ആയിട്ടുണ്ടെന്നും കോർപറേഷനും കായിക വകുപ്പും തമ്മിൽ തർക്കങ്ങളില്ലെന്നും മന്ത്രിയോടൊപ്പമുണ്ടായിരുന്ന മുൻ ഡെപ്യൂട്ടി മേയറും ഡി.പി.സി അംഗവുമായ വർഗീസ് കണ്ടംകുളത്തി പറഞ്ഞു. മേയർ അജിത വിജയൻ കൗൺസിലർമാരായ അനൂപ് ഡേവിസ്, ലാലി ജെയിംസ് എന്നിവരും മന്ത്രിയോടൊപ്പം ഉണ്ടായിരുന്നു.
