തിരുവനന്തപുരം : വിഴിഞ്ഞത്തെ വൃദ്ധയുടെ കൊലപാതകം ആസൂത്രിതമെന്ന് പൊലീസ്. 71 കാരി ശാന്തകുമാരിയില്‍ നിന്നും കവർന്ന സ്വർണവുമായി നാടുവിടുകയായിരുന്നു പ്രതികളുടെ ലക്ഷ്യം. കവർന്ന സ്വർണത്തിന്‍റെ ഒരു ഭാഗം പണയം വച്ചതായും പൊലീസ് കണ്ടെത്തി.
വിഴിഞ്ഞം സ്വദേശിയും 50 കാരിയുമായ റഫീഖ ബീവി വാടകക്കെടുത്ത വീട്ടിലാണ് സമീപവാസിയായ ശാന്തകുമാരിയുടെ മൃതദേഹം കണ്ടെത്തിയത്. ഷീറ്റ് മേഞ്ഞ വീടിന്‍റെ തട്ടിൽ തലയ്ക്കടിയേറ്റ് വികൃതമായ നിലയിലായിരുന്നു ശാന്തകുമാരിയുടെ മൃതദേഹം. സമീപത്തുനിന്നും ആക്രമണത്തിന് ഉപയോഗിച്ച ചുറ്റികയും പൊലീസ് കണ്ടെത്തി.
സംഭവവുമായി ബന്ധപ്പെട്ട് റഫീഖ ബീവിയുടെ മകൻ ഷഫീഖ്, റഫീഖയുടെ ആൺ സുഹൃത്ത് കോഴിക്കോട് സ്വദേശി അൽ അമീൻ എന്നിവരെയും പൊലീസ് കസ്റ്റഡിയിലെടുത്തു. ഇവരെ ചോദ്യം ചെയ്‌തുവരികയാണ്.
ഏതാനും മാസങ്ങൾക്ക് മുമ്പാണ് മുല്ലൂർ സ്വദേശി നമ്പീശൻ എന്ന കുമാറിന്‍റെ വീട് റഫീഖ വാടകയ്‌ക്കെടുത്തത്. അൽ അമീനും ഇവിടെ എത്തിയതോടുകൂടി മദ്യപാനവും തുടർന്നുള്ള വാക്കേറ്റവും പതിവായിരുന്നു. സമീപവാസികളുടെ പരാതിയെ തുടർന്ന് നമ്പീശൻ ഇവരോട് വീടൊഴിയാൻ ആവശ്യപ്പെട്ടിരുന്നു. വെള്ളിയാഴ്‌ച ഒഴിയണമെന്നായിരുന്നു അന്ത്യശാസനം. രാത്രി വൈകിയും താക്കോൽ ലഭിക്കാത്തതിനാൽ വീട്ടുടമസ്ഥൻ നടത്തിയ പരിശോധനയിൽ ആണ് സംഭവം പുറത്തറിയുന്നത്.
വീട്ടിൽ താക്കോൽ ഉപേക്ഷിച്ച ശേഷം സംഘം കടന്നുകളഞ്ഞെന്നാണ് ഉടമസ്ഥൻ കരുതിയത്. വീടിന് മുകളിൽ കയറി മുറി പരിശോധിച്ചപ്പോൾ മുറിയിൽ തളം കെട്ടി കിടക്കുന്ന രക്തവും, തട്ടിൻപുറത്ത് മൃതദേഹത്തിന്‍റെ കാലും കണ്ട് വീട്ടുടമ വിഴിഞ്ഞം പൊലീസിനെ വിവരമറിയിക്കുകയായിരുന്നു.
റഫീഖയുടെ മൃതദേഹമാണ് കണ്ടത് എന്നായിരുന്നു വാർത്തകൾ പരന്നത്. എന്നാൽ രാവിലെ മുതൽ അയൽവാസിയായ ശാന്തകുമാരിയെ കാണാനില്ലെന്ന് ബന്ധുക്കൾ സ്റ്റേഷനിൽ പരാതി നൽകിയിരുന്നു. പൊലീസ് പരിശോധനയിലാണ് മൃതദേഹം ശാന്തകുമാരിയുടേതാണെന്ന് തിരിച്ചറിഞ്ഞത്.
അയൽവാസികളോട് അത്ര ബന്ധമില്ലാത്ത ശാന്തകുമാരി റഫീഖയോടും കുടുംബത്തോടും അടുത്ത ബന്ധം പുലർത്തിയിരുന്നു. ഇരുകൂട്ടരും പരസ്‌പരം ഭവന സന്ദർശനങ്ങളും പതിവായിരുന്നു. കൃത്യത്തിനു ശേഷം ശാന്തകുമാരിയുടെ മോഷ്‌ടിച്ച മാലയുടെ ഒരു ഭാഗം സ്വകാര്യസ്ഥാപനത്തിൽ പണയം വെച്ച ശേഷം സംഘം കോഴിക്കോട്ടേക്ക് പോകാൻ ശ്രമിക്കുകയായിരുന്നു. ഇതിനിടയിലാണ് പ്രതികളെ കഴക്കൂട്ടത്തുനിന്ന് പൊലീസ് പിടികൂടിയത്.
വിശദമായ ചോദ്യം ചെയ്യലിൽ പ്രതികള്‍ കുറ്റം സമ്മതിച്ചു. ഫോർട്ട് എസിപി യുടെ നേതൃത്വത്തിൽ ഇൻക്വസ്റ്റ് തയാറാക്കി മൃതദേഹം തിരുവനന്തപുരം മെഡിക്കൽ കോളജിലേക്ക് മാറ്റി. പ്രതികളെ ഇന്ന് സ്ഥലത്തെത്തിച്ച് തെളിവെടുപ്പ് നടത്തും.
അതേസമയം, ശാന്തകുമാരി കേസിന്‍റെ അന്വേഷണത്തിനിടെ ഒരു വർഷം മുൻപ് പ്രതികൾ നടത്തിയ 14കാരിയുടെ കൊലപാതകത്തിന്‍റെയും ചുരുളഴിഞ്ഞു. ചോദ്യം ചെയ്യലിനിടെ വീട്ടുടമസ്ഥൻ നൽകിയ സൂചനയാണ് പെൺകുട്ടിയുടെ കൊലപാതകത്തിലേക്ക് വിരൽ ചൂണ്ടിയത്.
പ്രതികൾ മുൻപ് കഴിഞ്ഞിരുന്ന വീടിനടുത്ത് താമസിച്ചിരുന്ന പെൺകുട്ടിയെ ഷഫീഖ് പീഡനത്തിനിരയാക്കുമായിരുന്നു. വിവരം പുറത്തറിയാതിരിക്കാന്‍ റഫീഖയും ഷഫീഖും ചേർന്ന് കൊലപ്പെടുത്തുകയുമായിരുന്നുവെന്ന് അന്വേഷണത്തിൽ തെളിഞ്ഞു.
സംഭവത്തിൽ കൂടുതൽ അന്വേഷണം നടത്തിയാൽ മാത്രമേ കൊലപാതകത്തെ കുറിച്ചുള്ള കൂടുതൽ വിവരങ്ങൾ അറിയാനാകൂവെന്ന് പൊലീസ് പറഞ്ഞു.
