തിരുവനന്തപുരം : സ്‌പീക്കർ പദവിയിലേക്ക് മാത്രമല്ല ചരിത്രത്തിലേക്ക് കൂടിയാണ് എഎന്‍ ഷംസീർ നടന്നുകയറിയതെന്ന് പ്രതിപക്ഷ നേതാവ് വിഡി സതീശൻ. കേരള നിയമസഭയുടെ 24-ാം സ്‌പീക്കറായി തെരഞ്ഞെടുക്കപ്പെട്ട എഎൻ ഷംസീറിനുള്ള അനുമോദന പ്രസംഗത്തിലാണ് വിഡി സതീശന്‍റെ പരാമര്‍ശം. ആർ ശങ്കരനാരായണൻ തമ്പി മുതൽ സഭയുടെ അന്തസ് ഉയർത്തിപ്പിടിച്ച പാരമ്പര്യമാണ് സ്‌പീക്കർമാർക്കുള്ളത്.
''സ്‌പീക്കർ നിഷ്‌പക്ഷനായിരിക്കണമെന്നും റഫറിയായിരിക്കണമെന്നും പ്രതിപക്ഷം പറയുന്നില്ല. പ്രതിപക്ഷത്തിന്‍റെ അവകാശങ്ങൾ കൂടി സംരക്ഷിക്കുന്ന ആളാകണം. അതിന് അങ്ങ് മുൻപന്തിയില്‍ നിൽക്കുമെന്ന് ഉറപ്പുണ്ട്'' - അനുമോദന പ്രസംഗത്തിൽ സതീശൻ വ്യക്തമാക്കി. മുൻ നിയമസഭ സ്‌പീക്കറായ എംബി രാജേഷിന്‍റെ പ്രവർത്തനങ്ങളേയും വിഡി സതീശൻ അഭിനന്ദിച്ചു.
യുഡിഎഫ് സ്ഥാനാര്‍ഥിയായി മത്സരിച്ച അന്‍വര്‍ സാദത്തിനെ 40നെതിരെ 96 വോട്ടുകള്‍ക്കാണ് ഷംസീർ പരാജയപ്പെടുത്തിയത്. തലശ്ശേരി മണ്ഡലത്തില്‍ നിന്നുള്ള നിയമസഭാംഗമാണ് എ.എൻ ഷംസീർ.
