തിരുവനന്തപുരം : നിയമസഭ സ്‌പീക്കറുടെ ഓഫിസിനുമുന്നിലെ സംഘർഷം ചിത്രീകരിച്ചതിന്‍റെ പേരിൽ തന്‍റെ സ്റ്റാഫുകൾക്ക് നോട്ടിസ് അയച്ച സംഭവത്തിൽ രൂക്ഷ വിമർശനവുമായി പ്രതിപക്ഷ നേതാവ് വി ഡി സതീശൻ. സംഘർഷത്തിന്‍റെ ദൃശ്യങ്ങൾ ചിത്രീകരിച്ച മന്ത്രിമാരുടെ പേഴ്‌സണൽ സ്റ്റാഫിന് നോട്ടിസ് നൽകാൻ നിയമസഭ സെക്രട്ടേറിയറ്റിന് ധൈര്യമുണ്ടോയെന്ന് വി ഡി സതീശൻ ചോദിച്ചു. തന്‍റെ സ്റ്റാഫുകളുടെ പേരും സ്ഥാനവും തെറ്റിച്ചാണ് നോട്ടിസ് അയച്ചിരിക്കുന്നത്.
തനിക്ക് ഇല്ലാത്ത ഒരു പേഴ്‌സണൽ അസിസ്റ്റന്‍റിന്‍റെ പേര് പറഞ്ഞാണ് നോട്ടിസ് അയച്ചത്. എത്ര ലാഘവത്തോടുകൂടിയാണ് നിയമസഭ സെക്രട്ടേറിയറ്റ് നോട്ടിസ് അയച്ചിരിക്കുന്നത് എന്നും വി ഡി സതീശൻ ചോദിച്ചു. സ്‌പീക്കർ ഇക്കാര്യം അറിഞ്ഞിട്ടുണ്ടെങ്കിൽ ഗൗരവമായി ഇടപെടണമെന്നും വി ഡി സതീശന്‍ ആവശ്യപ്പെട്ടു. തങ്ങളെ ഭയപ്പെടുത്താന്‍ ഭീഷണിയുമായി ആരും വരേണ്ട എന്നും തങ്ങളുടെ പേഴ്‌സണല്‍ സ്റ്റാഫുകളെ കുറ്റക്കാരാക്കാം എന്ന് കരുതേണ്ടെന്നും വി ഡി സതീശന്‍ പറഞ്ഞു. മന്ത്രിമാരുടെ പേഴ്‌സണൽ സ്റ്റാഫുകൾ സംഘർഷത്തിന്‍റെ ദൃശ്യങ്ങൾ ചിത്രീകരിച്ചതിന് തെളിവ് നൽകാമെന്നും വി ഡി സതീശൻ വ്യക്തമാക്കി.
നിയമസഭ സമ്മേളന കാലത്ത് നടന്നതിന്‍റെ ഒരു തുടർച്ചയാണിത്. അത് എകെജി സെന്‍ററിൽ നിന്നുള്ള നിയന്ത്രണമാണ്. നോട്ടിസ് അയച്ച സംഭവം നിയമപരമായി നേരിടുമെന്നും പ്രതിപക്ഷ നേതാവ് വ്യക്തമാക്കി. ഈ മാസം 23 ന് വിരമിക്കുന്ന ഹൈക്കോടതി ചീഫ് ജസ്റ്റിസ് എസ് മണികുമാറിന് യാത്രയയപ്പ് നല്‍കുന്നതിനായി കോവളം ലീല ഹോട്ടലിൽ സംഘടിപ്പിച്ച വിരുന്നിൽ മുഖ്യമന്ത്രി പങ്കെടുത്ത സംഭവത്തിലും വി ഡി സതീശൻ പ്രതികരിച്ചു.
'ഇത്തരം നടപടികളെല്ലാം വളരെ വിചിത്രമായി തോന്നുന്നു. ഇതുവരെ ഇല്ലാത്ത പുതിയ സംവിധാനമാണിത്. മുഖ്യമന്ത്രിയും മന്ത്രിമാരും ഒരു ഫൈവ് സ്റ്റാർ ഹോട്ടലിൽ പോയി രഹസ്യമായി യാത്രയയപ്പ് നൽകേണ്ട സ്ഥാനമല്ല കേരള ഹൈക്കോടതി ചീഫ് ജസ്റ്റിസിന്‍റേത്. ഇപ്പോഴെങ്കിലും പിണറായി വിജയന് ഹൈക്കോടതി ചീഫ് ജസ്റ്റിസിനോട് ആദരവ് തോന്നിയതിൽ സന്തോഷമുണ്ട്.
പണ്ട് എസ്എൻസി ലാവലിൻ കേസിൽ വിധി പ്രഖ്യാപിച്ച ചീഫ് ജസ്റ്റിസിന് അൺസെറിമോണിയൽ സെന്‍റ് ഓഫാണ് നൽകിയത്. എസ്എഫ്ഐക്കാരെയും ഡിവൈഎഫ്ഐക്കാരെയും ഹൈക്കോടതിക്ക് മുന്നിൽ അയച്ച് പ്രകടനം നടത്തി മുദ്രാവാക്യം വിളിച്ചാണ് കേരളത്തിൽ നിന്നും യാത്രയാക്കിയത്. എന്നാൽ ഇപ്പോൾ ചീഫ് ജസ്റ്റിസ് എസ് മണികുമാറിന് ഇത്തരത്തിൽ യാത്രയയപ്പ് നൽകിയത് എന്തിനെന്ന് മുഖ്യമന്ത്രി തന്നെ വ്യക്തമാക്കുന്നതാണ് നല്ലത്' -വി ഡി സതീശൻ കൂട്ടിച്ചേർത്തു.
അതേസമയം സ്‌പീക്കറുടെ ഓഫിസിന് മുന്നിലെ സംഘർഷം ചിത്രീകരിച്ചതിന് പ്രതിപക്ഷ നേതാവിന്‍റെ മൂന്ന് സ്റ്റാഫുകൾക്കാണ് നോട്ടിസ് അയച്ചത്. പ്രതിപക്ഷ നേതാവിന്‍റെ പി എ വിനീത് നോട്ടിസ് കൈപ്പറ്റി. എന്നാൽ മറ്റ് രണ്ട് സ്റ്റാഫുകൾ നോട്ടിസിൽ പറഞ്ഞ തസ്‌തികയിൽ ജോലി ചെയ്യുന്നില്ലെന്ന് അറിയിച്ച് മടക്കി അയച്ചു. കൂടാതെ നിയമസഭ അണ്ടർ സെക്രട്ടറി മെമ്മോ നൽകിയ നടപടി പുനഃപരിശോധിക്കണമെന്നും പ്രതിപക്ഷ നേതാവിന്‍റെ ഓഫിസ് ആവശ്യപ്പെട്ടിട്ടുണ്ട്.
