തിരുവനന്തപുരം : കേരളത്തിൻ്റെ ആദ്യ വന്ദേ ഭാരത് എക്സ്പ്രസ് പ്രധാനമന്ത്രി നരേന്ദ്ര മോദി നാടിന് സമർപ്പിച്ചു. രാവിലെ 11.12 ന് തിരുവനന്തപുരം സെൻട്രൽ റെയിൽവേ സ്റ്റേഷനിൽ നടന്ന ചടങ്ങിൽ വന്ദേ ഭാരത് എക്‌സ്പ്രസിന് പച്ചക്കൊടി വീശി നരേന്ദ്ര മോദി ഫ്ലാഗ് ഓഫ് നിർവഹിച്ചു. ഗവർണർ ആരിഫ് മുഹമ്മദ് ഖാൻ, മുഖ്യമന്ത്രി പിണറായി വിജയൻ, കേന്ദ്ര മന്ത്രി അശ്വിനി വൈഷ്‌ണവ് അടക്കം സന്നിഹിതരായിരുന്നു.
-
#WATCH | Kerala: PM Narendra Modi flags off the Thiruvananthapuram Central-Kasaragod Vande Bharat Express train from Thiruvananthapuram Central railway station. pic.twitter.com/zdqdmwNE3g
— ANI (@ANI) April 25, 2023 " class="align-text-top noRightClick twitterSection" data="
">#WATCH | Kerala: PM Narendra Modi flags off the Thiruvananthapuram Central-Kasaragod Vande Bharat Express train from Thiruvananthapuram Central railway station. pic.twitter.com/zdqdmwNE3g
— ANI (@ANI) April 25, 2023#WATCH | Kerala: PM Narendra Modi flags off the Thiruvananthapuram Central-Kasaragod Vande Bharat Express train from Thiruvananthapuram Central railway station. pic.twitter.com/zdqdmwNE3g
— ANI (@ANI) April 25, 2023
10.30 ഓടെ തിരുവനന്തപുരം വിമാനത്താവളത്തിലെത്തിയ മോദിയെ ബിജെപി പ്രവർത്തകർ ചേർന്ന് ചെണ്ടമേളത്തിൻ്റെ അകമ്പടിയോടെയാണ് സ്വീകരിച്ചത്. ശംഖുമുഖത്ത് പ്രവർത്തകരുടെ നേതൃത്വത്തിൽ വൻ ആഘോഷ പരിപാടികളും സംഘടിപ്പിച്ചിരുന്നു. കനത്ത സുരക്ഷാവലയത്തിലാണ് മോദി വിമാനത്താവളത്തിൽ നിന്നും തിരുവനന്തപുരം സെൻട്രൽ റെയിൽവേ സ്റ്റേഷനിലേക്ക് എത്തിയത്. വെല്ലിംഗ്‌ടൺ ദ്വീപിലെ ആഡംബര ഹോട്ടലിൽ നിന്ന് രാവിലെ 9.37 ഓടെയാണ് മോദി തിരുവനന്തപുരത്തേക്ക് തിരിച്ചത്.
അത്യാധുനിക യാത്രാസൗകര്യമാണ് വന്ദേ ഭാരത് എക്‌സ്‌പ്രസിൻ്റെ സവിശേഷത. ശീതീകരിച്ച 16 ബോഗികളാണ് വന്ദേ ഭാരത് എക്‌സ്‌പ്രസിൽ ഉള്ളത്. ചെയർകാറും എക്‌സിക്യുട്ടീവ് ബോഗിയും ഇതിലുള്‍പ്പെടും. എക്‌സിക്യുട്ടീവ് കോച്ചിലെ സീറ്റുകൾ 180 ഡിഗ്രിയിൽ തിരിക്കാൻ സാധിക്കും. സിസിടിവി സുരക്ഷ, ഫസ്റ്റ് എയ്‌ഡ് ബോക്‌സ്, ഓട്ടോമാറ്റിക് ഡോറുകൾ, വൺ ടച്ച് അലാറം, അത്യാധുനിക സൗകര്യത്തോടുകൂടിയുള്ള ശുചിമുറികൾ തുടങ്ങിയവയാണ് വന്ദേ ഭാരത് ട്രെയിനുകളുടെ സവിശേഷത.
കുഞ്ഞുങ്ങളുടെ ഡയപ്പർ ചേഞ്ച് ചെയ്യാനുള്ള സംവിധാനവും ട്രെയിനിലുണ്ട്. ട്രെയിനിന്‍റെ യാത്രാവിവരങ്ങൾ ഡിജിറ്റൽ സ്ക്രീനിൽ എല്ലാ ബോഗിയിലും പ്രദർശിപ്പിക്കും. ഏപ്രിൽ 28 മുതലാണ് വന്ദേ ഭാരത് പതിവ് സർവീസ് ആരംഭിക്കുന്നത്.
കുട്ടികളുമായി സംവദിച്ച് പ്രധാനമന്ത്രി : ഉദ്ഘാടന സ്‌പെഷ്യൽ സർവീസിൽ തെരഞ്ഞെടുക്കപ്പെട്ട വിദ്യാർഥികൾക്കും മാധ്യമപ്രവർത്തകർക്കും ക്ഷണിക്കപ്പെട്ടവർക്കുമായിരുന്നു പ്രവേശനം. ഫ്ലാഗ് ഓഫിന് മുൻപ് കുട്ടികളുമായും പ്രധാനമന്ത്രി സംവദിച്ചു. പ്രത്യേകം സജ്ജമാക്കിയ സി2 കോച്ചിലാണ് മോദി വിദ്യാർഥികളുമായി സംവദിച്ചത്. വന്ദേ ഭാരതുമായി ബന്ധപ്പെട്ട് വരച്ച ചിത്രങ്ങളും എഴുതിയ കവിതകളും കുട്ടികള്‍ പ്രധാനമന്ത്രിയെ കാണിക്കുകയും അദ്ദേഹവുമായി ആശയവിനിമയം നടത്തുകയും ചെയ്‌തു.
വന്ദേ ഭാരത് എക്‌സ്പ്രസിന്‍റെ സമയക്രമം : രാവിലെ 5.20ന് തിരുവനന്തപുരം സെൻട്രൽ റെയിൽവേ സ്റ്റേഷനിൽ നിന്നും വന്ദേ ഭാരത് പുറപ്പെടും. കൊല്ലമാണ് ട്രെയിനിന്‍റെ ആദ്യത്തെ സ്റ്റോപ്പ്. 1.25ന് കാസർകോട് എത്തും. ഉച്ചയ്ക്ക് 2.30 നാണ് മടക്കയാത്ര ആരംഭിക്കുന്നത്. രാത്രി 10.35 ന് ട്രെയിൻ തിരുവനന്തപുരത്ത് തിരികെ എത്തും. എട്ട് മണിക്കൂർ അഞ്ചുമിനിറ്റാണ് കാസർകോട് എത്താനെടുക്കുന്ന സമയം.
വന്ദേ ഭാരത് എക്‌സ്പ്രസിന് ഫ്ലാഗ് ഓഫ് നിർവഹിച്ച ശേഷം പ്രധാനമന്ത്രി 11 മണിക്ക് തിരുവനന്തപുരം സെൻട്രൽ സ്റ്റേഡിയത്തിൽ നടക്കുന്ന പരിപാടിയിൽ പങ്കെടുക്കും. കേന്ദ്രസർക്കാർ സംസ്ഥാനത്ത് നടപ്പാക്കുന്ന 3,200 കോടി രൂപയുടെ വികസന പദ്ധതികളുടെ സമർപ്പണവും തറക്കല്ലിടലും പ്രധാനമന്ത്രി നിർവഹിക്കും. കൊച്ചി വാട്ടർ മെട്രോ, ഡിജിറ്റൽ സർവകലാശാല ഉൾപ്പടെയുള്ള നിരവധി പദ്ധതികൾ പ്രധാനമന്ത്രി ഉദ്ഘാടനം ചെയ്യും. തുടർന്ന് 12:40ന് ഗുജറാത്തിലെ സൂറത്തിലേക്ക് തിരിക്കും.
