തിരുവനന്തപുരം: മുഖ്യമന്ത്രി പിണറായി വിജയനും സിപിഎം സംസ്ഥാന സെക്രട്ടറി എംവി ഗോവിന്ദനുമെതിരെ രൂക്ഷവിമർശനവുമായി കേന്ദ്രമന്ത്രി വി മുരളീധരൻ. അക്രമികൾക്ക് സംസ്ഥാന സർക്കാർ കൂട്ടുനിൽക്കുന്നുവെന്ന് മുരളീധരൻ പറഞ്ഞു. പോപ്പുലർ ഫ്രണ്ട് ഓഫ് ഇന്ത്യ സംസ്ഥാനത്ത് ആഹ്വാനം ചെയ്‌ത ഹർത്താലിനിടെയുണ്ടായ അക്രമസംഭവങ്ങളുടെ പശ്ചാത്തലത്തിൽ മാധ്യമങ്ങളോട് സംസാരിക്കുകയായിരുന്നു അദ്ദേഹം.
മുഖ്യമന്ത്രിയുടെ ജോലി അക്രമത്തെ അപലപിക്കലല്ലെന്നും ഒഴിവാക്കാനാണ് ശ്രമിക്കേണ്ടതെന്നും മുരളീധരൻ പറഞ്ഞു. വായിൽ തോന്നുന്നത് കോതയ്‌ക്ക് പാട്ട് എന്ന നിലയിലാണ് എംവി ഗോവിന്ദൻ കാര്യങ്ങൾ വിളിച്ച് പറയുന്നത്. രാജ്യത്ത് എന്താണ് നടക്കുന്നതെന്ന് സിപിഎം സംസ്ഥാന സെക്രട്ടറി മനസിലാക്കണം. പിഎഫ്ഐ നിരോധനത്തിൽ ഉചിതമായ സമയത്ത് ഉചിതമായ നടപടി സ്വീകരിക്കുമെന്നും കേന്ദ്രമന്ത്രി തിരുവനന്തപുരത്ത് പറഞ്ഞു.
കഴിഞ്ഞ ദിവസം ബിജെപി നേതാവും മുൻ കേന്ദ്രമന്ത്രിയുമായ പ്രകാശ് ജാവദേകർ എംപിയും സംസ്ഥാന സർക്കാരിനെതിരെ രൂക്ഷവിമർശനം ഉന്നയിച്ചിരുന്നു. ഹർത്താലിനിടെ ഉണ്ടായ അക്രമങ്ങൾ തടയുന്നതിൽ കേരള സർക്കാർ പരാജയപ്പെട്ടുവെന്ന് അദ്ദേഹം പറഞ്ഞു. സിപിഎമ്മിന് പിഎഫ്ഐയുടെ പിന്തുണ ലഭിക്കുന്നുണ്ടെന്നും മിക്ക തദ്ദേശ സ്ഥാപനങ്ങളിലും സിപിഎം പിഎഫ്ഐയുമായി സഖ്യത്തിലാണെന്നും അദ്ദേഹം ആരോപിച്ചിരുന്നു.
READ MORE:പിഎഫ്‌ഐയെ തടയുന്നതില്‍ കേരള സര്‍ക്കാര്‍ പരാജയപ്പെട്ടുവെന്ന് പ്രകാശ് ജാവദേകർ
