തിരുവനന്തപുരം: ഗവർണർ ആരിഫ് മുഹമ്മദ് ഖാന് ഇ-മെയിലിലൂടെ വധഭീഷണി അയച്ച സംഭവത്തിൽ പ്രതിയെ പൊലീസ് പിടികൂടി. കോഴിക്കോട് സ്വദേശി ഷംസുദ്ദീനെയാണ് പൊലീസ് അറസ്റ്റ് ചെയ്‌തത്. പത്ത് ദിവസത്തിനകം ഗവര്‍ണറെ വധിക്കുമെന്നായിരുന്നു ഭീഷണി സന്ദേശം.
ഇന്നലെയാണ് ഗവർണർക്ക് ഭീഷണി സന്ദേശം ലഭിച്ചത്. സംഭവത്തെ തുടർന്ന് ഗവര്‍ണറുടെ ഓഫിസ് തിരുവനന്തപുരം സിറ്റി പൊലീസ് കമ്മിഷണര്‍ക്ക് പരാതി നൽകിയിരുന്നു. പരാതിയുടെ അടിസ്ഥാനത്തിൽ സൈബർ പൊലീസ് നടത്തിയ അന്വേഷണത്തിൽ ഇ-മെയിൽ അയച്ചത് കോഴിക്കോട് നിന്നാണെന്ന് പൊലീസ് കണ്ടെത്തി.
വിവരം ഉടൻ തന്നെ കോഴിക്കോട് സിറ്റി പൊലീസിന് കൈമാറി. കോഴിക്കോട് സിറ്റി പൊലീസ് നടത്തിയ അന്വേഷണത്തിലാണ് ഷംസുദ്ദീനെ പൊലീസ് അറസ്റ്റ് ചെയ്‌തത്. ഇയാളെ ചോദ്യം ചെയ്‌തുവരികയാണ്.
